नयाँ दिल्ली, 21 जनवरी
भारतका प्रधानमन्त्री नरेन्द्र मोदी र नेपालका प्रधानमन्त्री केपी शर्मा ओलीले संयुक्त रुपमा भिडियो कन्फ्रेसमार्फत् विराटनगर एकीकृत जाँच चौकीको उद्घाटन गर्नु भएको छ । प्रधानमन्त्री नरेन्द्र मोदीले दिल्ली र नेपालका समकक्षी केपी ओलीले काठमाण्डौबाट संयुक्त रूपमा भिडिओ कन्फरेन्स मार्फत बिहान ११ बजे यसको उद्घाटन गर्नु भएको हो । आयात तथा निर्यात पारवहन सहज बनाउन विराटनगर महानगरपालिका १८ मा निर्मित आईसीपी सञ्चालनका लागि तयार भइसकेकाे छ ।
कार्यक्रममा बोल्दै प्रधानमन्त्री केपी शर्मा ओलीले भारतीय प्रधानमन्त्री नरेन्द्र माेदीलाई नेपाल भ्रमणकाे निमन्त्रणा गर्नुभएको छ भने माेदीले दुई देशबीचकाे सम्बन्धकाे आयामलाई कायम राख्नु पर्ने बताउनुभएको छ । उद्घाटनसँगै नेपाल र भारत सरकारको संयुक्त लगानीमा विराटनगरमा निर्मित एकीकृत जाँच केन्द्र (आईसीपी) आजबाट सञ्चालनमा आएको छ । डिजिटल भिडियो कन्फ्रेन्स मार्फत दुई प्रधानमन्त्रीले स्वीच अन गरेर यसको उद्घाटन गर्नुभएको हो ।
प्रदेश १ मा विराटनगर महानगरपालिकाको भेडियारीमा एकीकृत चेक पाेस्ट (आईसीपी) निर्माण भएको छ । सन् २०१७ मा भारतको गुजरात राज्यकाे दिनेशचन्द्र आर अग्रवाल इन्फ्राकन प्रालीले आईसीपीको निर्माणको ठेक्का पाएसँगै काम सुरु भएकाे थियो । एक अर्ब १४ करोड भारतीय रुपैयाँको लागतमा इन्फ्राकनले आईसीपी निर्माण सम्पन्न गरेको जनाएको छ । आईसीपी एक सय २९ बिघा क्षेत्रफलमा फैलिएको छ । आईसीपी परिसरबाहिर ४० बिघा जमिन छ । सीमाको दसगजालाई आधार बनाएर आईसीपी निर्माण गरिएको हो ।
