नयांँ दिल्ली डेस्क, 3 मे 2020
भारतमा कोरोना भाइरसबाट संक्रमित व्यक्तिको संख्या दिन प्रतिदिन बढिरहेको छ। भारत अहिलेसम्म संक्रमित हुनेहरूको संख्या लगभग 40 हजार पुगेको छ। पछिल्लो 24 घण्टामा भारतमा कोरोना भाइरसको संक्रमणबाट 83 जनाको मृत्यु भएको छ, भने 2 हजार 644 नयाँ संक्रमित थपिएका छन्।
यससँगै कोरोनाबाट मृत्यु हुनेको संख्या 1 हजार 301 पुगेको छ, भने संक्रमितको कुल संख्या 39 हजार 980 पुगेको छ। संक्रमितमध्ये 10 हजार 633 जना निको भएका छन्। कुल संक्रमितमध्ये 28 हजार 46 जनाको उपचार चलिरहेको छ।
महाराष्ट्रमा सबैभन्दा बढी संक्रमित देखिएका छन्। प्राप्त विवरण अनुसार त्यहाँ संक्रमितको संख्या 12 हजार 296 पुगेको छ, भने 521 जनाको मृत्यु भएको छ। गुजरातमा 5 हजार 54 जना संक्रमित भएका र 262 जनाको मृत्यु भएको छ। राजधानी नयाँ दिल्लीमा 4 हजार 123 जना संक्रमित भएका मध्ये 64 जनाको ज्यान गएको छ। 1 हजार 256 जनाको उपचारपछि ठिक भएका छन्।
त्यसैगरी मध्य प्रदेशमा 2 हजार 846 जनामा कोरोना पोजेटिभ देखिएकामा 624 जना ठीक भएका छन् भने 151 जनाको ज्यान गएको छ। भारतमा पहिलो पटक कोरोना देखिएको केरला राज्यमा 499 जनामा कोरोना संक्रमण देखिएको छ। भारतमा आगामी मे 17 तारिखसम्म लकडाउन घोषणा गरिएको छ।
कोरोना संक्रमणको आधारमा मुलुकलाई अति प्रभावित, सामान्य र कोरोना संक्रमण नदेखिएका क्षेत्रमा वर्गीकरण गरी लकडाउनलाई खुकुलो पारिएको छ।