नयाँदिल्ली, १ फेब्रुअरी
भारतको राजधानी नयाँ दिल्लीस्थित जामिया मिल्लिया विश्वविद्यालयको बाहिर प्रदर्शन गरिरहेका विद्यार्थीमध्येबाट एक युवकले पेस्तोल तेस्र्याएको, गोली चलाएको र यस क्रममा प्रहरीले निर्वाह गरेको भूमिकालाई लिएर अनेक प्रश्न उठ्न थालेको छ ।
प्रहरीका अनुसार दिनदहाडै सडकमा त्यसरी पेस्तोल बोकेर चारैतिर हल्लाउँदै हिँड्ने व्यक्तिको नाम गोपाल हो । ती युवकले आफूलाई ‘रामभक्त गोपाल’ भनेर चिनाएको प्रहरीको भनाइ छ ।
प्रहरीका अनुसार दिनदहाडै सडकमा त्यसरी पेस्तोल बोकेर चारैतिर हल्लाउँदै हिँड्ने व्यक्तिको नाम गोपाल हो । ती युवकले आफूलाई ‘रामभक्त गोपाल’ भनेर चिनाएको प्रहरीको भनाइ छ ।
उनले गोली चलाउनुअघि फेसबुकमा लगातार अपडेट गरिरहेका थिए । पत्रकार विनोद कापडीले ४५ सेकेन्डको एक भिडियो सेयर गरेका छन्, जसमा ती युवकले सडकमा हिँड्दै पेस्तोल तेस्र्याएको र गोली चलाएको देखिन्छ । भिडियोमा सोही स्थानमा रहेका प्रहरी भने मुकदर्शक देखिन्छन् ।
सोही क्रममा केही क्यामेरामेनले युवकको हातमा पेस्तोल रहेको भन्दै चिच्याइरहेको देखिन्छ । गोली चलिसकेपछि प्रहरीले ती युवकलाई पक्राउ गर्छ र जिपमा राखेर लैजान्छ । ती युवकले चिच्याउँदै आफू ‘रामभक्त’ रहेको बताएका थिए ।
कैयौँले दिल्ली पुलिसलाई ट्विटरमा ट्याग गर्दै सोधिरहेका छन् कि ती युवकले पेस्तोल देखाउँदै हिँडिरहेको अवस्थामा पुलिस किन हात बाँधेर बसिरहेको ? उसलाई रोक्न वा नियन्त्रणमा लिन किन प्रयास नगरेको भनेर उनीहरुले प्रश्न गरिरहेका छन् ।
उत्तरपूर्वी जिल्लाका उपकमिस्नर चिन्मय बिस्वालले प्रहरीमाथि उठाइएका प्रश्नको औचित्य नरहेको बताए । उनले प्रहरीमाथि आरोप लगाउनु नयाँ कुरा नभएको टिप्पणी गर्दै भने, ‘यो प्रदर्शनका लागि अनुमति दिइएको थिएन, हामीले विद्यार्थीलार्ई याली ननिकाल्न भनेका थियौँ ।’
प्रहरीले गोली चलाउने युवकलाई समयमै रोक्न वा नियन्त्रणमा लिन नसकेको प्रश्नको जवाफमा उनले भने, ‘पुलिस होली फेमिली अस्पताल अगाडि उभिएको थियो, प्रदर्शनकारीहरुको आचरणका कारण प्रहरी उनीहरुतर्फ थिएन । भीडमा निगरानी गर्ने काम आयोजकको पनि हुन्छ, कोही असामाजिक तत्वको घुसपैठ नहोस् भनेर आयोजक आफैँ जिम्मेवार हुनुपर्छ ।’
हमलाकारी युवक हाल प्रहरीको नियन्त्रणमा छन् । उनीसँग सोधपुछ भइरहेको उनले बताए ।
