दार्जीलिङ, 8 जनवरी/ कयेश अंसारी
केन्द्र सरकारको नीतिको विरोधमा आज डाकिएको भारत बन्दको प्रभाव मिश्रीत देखिएको छ । विभिन्न 10 केन्द्रीय मजदूर संगठनहरुले बुधवार देशव्यापी भारत बन्द आह्वान गरेका हुन ।
बन्दको प्रभाव एनडीएको सरकार नरहेको राज्यहरुमा देखिएको छ भने बाँकी स्थानहरुमा बन्दको प्रभाव न्यून रहेको छ । पश्चिम बंगालको दार्जीलिङमा पनि बन्दको प्रभाव खाशै रहेन । हाम्रा संवाददाताले बताए अनुसार आज दार्जीलिङ पहाड पुरै खुल्ला रहेको छ । तर हिजोको तुलनामा आज सवारी साधनहरु कम गुडेका छन । अर्कोतर्फ दार्जीलिङबाट न्यूजलपाईगुडीतर्फ जाने टोय ट्रेन यथावत संचालन भएका छन । पहाडमा दैनिक रुपमा आउने व्यापारीहरु पनि आज विहानै सवारी साधनबाट पुगेका थिए । तर सिलीगुडीबाट पहाडका विभिन्न भागमा जाने साना गाडीहरु दार्जीलिङभन्दा अगाडीसम्म मात्रै पुगेका थिए ।
अर्को तर्फ बन्दलाई प्रभावहीन बनाउन केन्द्र सरकारको कार्मिक मन्त्रालयले आदेश जारी गरि कर्मचारीहरुलाई हडतालबाट टाढा रहन भनेको थियो । मजदूर संगठनहरुले श्रम सुधार, प्रत्यक्ष विदेशी लगानी र निजीकरणको विरोधलगायत 12 सूत्रीय माग गर्दै आन्दोलन गरेका हुन ।
