नयाँ दिल्ली, 20 मार्च
मध्य प्रदेशमा चलिरहेको राजनीतिक घमासानका बिच आज मुख्यमन्त्री कमलनाथ नेतृत्वको काँग्रेस सरकार ढलेको छ । मुख्यमन्त्री कमलनाथले शुक्रवार राजीनामा दिएसँगै काँग्रेस नेतृत्वको गठबन्धन सरकार ढलेको हो। शुक्रवार फ्लोर टेस्ट गराउन सर्वोच्च अदालतले दिएको आदेश अघि नै कमलनाथले आज राजीनामा दिनुभएको हो ।
कमलनाथले पत्रकार सम्मेलन आयोजना गरेर राजीनामाको घोषणा गर्नुभएको हो। पत्रकार सम्मेलनमा भावुक हुनुभएका कमलनाथले भारतीय जनता पार्टीमाथि आक्रोश पनि पोख्नुभएको थियो ।
पत्रकार सम्मेनलमा बोल्दै आफुले १५ महिनामा गरेको कामको साक्षी राज्यका जनता भएको भन्दै मध्य प्रदेशमा १५ वर्ष पाएको भाजपालाई आफ्नो कामहरू मन नपरेको बताउनुभयो ।
आफूले गाईमाताकको संरक्षणका लागि गौशाला बनाएको, भयमुक्त प्रदेश बनाएको, युवाहरूलाई रोजगारी दिएको तर भाजपालाई यो सबै मन नपरेको बताउनुभयो ।
१५ महिनाको रिपोर्ट कार्ड प्रस्तुत गर्दै कमलनाथले प्रदेशको तस्वीर परिवर्तन गर्ने पूर्ण प्रयास गरेको अनि सधैं विकासमा विश्वास गरेको बताउनुभयो ।
