दिल्ली, 6 जुलाई 2022
नेपाल वायुसेवा निगम (नेपाल एयरलाइन्स) ले भारतको अर्थिक राजधानी मुम्बईमा नयाँ कार्यालय उद्धाटन गरेको छ । 4 जुलाईका दिन मुम्बईको अन्धेरी पूर्वको सबैभन्दा पुरानो कनकिया वाल स्ट्रीट स्थित कर्पोरेट भवनमा बलिउडकी चर्चित अभिनेत्री मनिषा कोइरालाले उक्त नयाँ कार्यालयको उद्घाटन गरेकी हुन । नेशनल लाईभ टिभीलाई प्राप्त जानकारी अनुसार प्रमुख अतिथि रहेकी कोइरालाले रिबन र केक काटेर उक्त कार्यालयको उद्धाटनपछि कार्यक्रमलाई संबोधन गर्दै आफु नेपाल एयरलाइन्सको बारम्बार यात्रु हुन् र नेपाल एयरलाइन्सको उडानमा चढ्दा आफूलाई घरको अनुभूति भएको बताइन् । उनले नेपाल वायुसेवा निगमको उडान संख्या बढाउन र यात्रुहरूलाई बीओएम क्षेत्रमा सेवा प्रदान गर्ने कामना गरिन् ।
एयरलाइन्सका प्रबंधक नवराज कोइरालाले अभिनेत्री कोइरालाले आफुहरुको निमन्त्रणा स्वीकार गर्दै उद्धाटन कार्यक्रममा सहभागि भएकोमा विशेष धन्यवाद व्यक्त गरेका थिए । साथै उनले कार्यक्रममा सहभागि हुने सबै अतिथीहरुप्रति पनि आधार प्रकट गर्दै सबैले यात्राको लागि राष्ट्रिय ध्वजावाहक नेपाल वायुसेवा निगम (नेपाल एयरलाइन्स)को सेवा लिनुपर्ने औल्याएका थिए । उनले आधिकारिक वेबसाइटमा नयाँ ठेगाना अपडेट गरिसकेको पनि जानकारी गराए । साथै उनले राउण्ड ट्रिप मुम्बई–काठमाण्डौ, काठमाण्डौ –मुम्बईको टिकट लिएमा जुलाई महिनाभरि एउटा टिकट निःशुल्क दिइने बताएका छन ।
निगमले हाल मुम्बई, नयाँ दिल्ली, बैंग्लोर, हङकङ, मलेसिया, थाइल्याण्ड, नारिता (जापान), दोहा (कतार), दुबई (संयुक्त अरब इमिरेट्स) र रियाद (साउदी अरब) बाट अन्तर्राष्ट्रिय उडानहरू सञ्चालन गर्दै आएको छ ।
