नयाँदिल्ली, १७ मार्च, २०२०
कोरोना भाइरसको जोखिमलाई ध्यानमा राख्दै मलेसियाले दुई साताका लागि सबै विदेशी नागरिकलाई मुलुक प्रवेशमा रोक लगाएको छ । मलेसियाले बुधबारबाट लागू हुने गरी यो निर्णय गरेको हो ।
प्रधानमन्त्री मुहिदिन यासिनले मार्च ३१ सम्म सबै देशका नागरिकलाई मलेसिया प्रवेशमा रोक लगाएको जानकारी गराएका हुन् । उनले टेलिभिजनमा सम्बोधन गर्दै मलेसियाका नागरिकलाई पनि सो मितिसम्म देशबाहिर जान रोक लगाएको बताए ।
योसँगै नेपाली कामदार पनि अब दुई साता मलेसिया जान पाउने छैनन् । मलेसियाले कुनै पनि भेला, खेलकुद र धार्मिक गतिविधि गर्न समेत रोक लगाएको छ । साथै शैक्षिक संस्था समेत बन्द भएका छन् ।
