काठमाडौं, 30 दिसम्बर 2021
काठमाडौंमा जारी नेकपा माओवादी केन्द्रको आठौं राष्ट्रिय महाधिवेशनमा अध्यक्ष पुष्पकमल दाहाल प्रचण्डको राजनीतिक प्रतिवेदनमाथि छलफल सकिएको छ । बिहीबार १४ वटा समूहले छलफलको निष्कर्ष प्रस्तुत गरेपछि छलफल सकिएको हो । यसअघि बुधबार ११ वटा समूहले प्रस्तुति राखेका थिए । समूहगत छलफल सकिएपछि अब बैठक शुक्रबार दिउँसो १ बजे बस्नेछ । शुक्रबार अनुशासन, लेखा र निर्वाचन आयोगको प्रतिवेदन पेश गर्ने र त्यसपछि प्रचण्डले जवाफ दिने माओवादी प्रचार तथा प्रकाशन बिभागका सचिव गोविन्द आचार्यले जानकारी दिनुभयो । उहाले छलफलका क्रममा समूहबाट धेरै सुझावहरु आएको जानकारी दिनुभयो । त्यस्तै सहभागीहरुले प्रतिवेदनमा आएका बिषयलाई कार्यान्वयन गर्नुपर्ने, एमसीसी यथास्थीतिमा पारित गर्न नहुने लगाएतका सुझाव दिएको उहाले बताउनुभयो । बन्दसत्रमा फरक मत कसैको पनि नआएको तर पुरक प्रस्ताव भने आएको जानकारी दिनुभयो । शुक्रबार बन्दसत्रमा सवै प्रतिवेदन पारित हुने र त्यसपछि निर्वाचन कार्यतालिका सार्वजनिक गर्ने तयारी निर्वाचन समितिले गरेको छ ।
