काठमाडौं, 29 दिसम्बर 2022
कांग्रेसका नेता तथा सांसद शेखर कोइरालाले मुलुकको अर्थतन्त्र अत्यन्तै डमाडोल अवस्थामा रहेकाले अहिलेको सरकारले आर्थिक, राजनीतिक र सामाजिक स्थिरता दिनुपर्ने बताएका छन् । विराटनगरस्थित कोइराला निवासमा बिहीबार प्रदेश सांसदहरुसँगको चियापान समारोहमा कोइरालाले मुलुकको अर्थतन्त्र चुनौतीपूर्ण अवस्थामा रहेकाले सरकारले अत्यन्तै गम्भीरतापूर्वक अघि बढ्नुको विकल्प नभएको बताएका हुन् ।
‘अहिलेको सरकारले राम्रो काम गरेर देशलाई अघि बढाएर समृद्धि ल्याउनुका साथै नेपालीहरुको आर्थिक, सामाजिक र राजनीतिक स्थिरता दिओस् भन्ने कामना गर्न चाहन्छु,’ उनले भने, ‘सन् २०२३ मा विश्वभरि नै आर्थिक संकट बढ्दै जाने अर्थविद्हरुको प्रक्षेपण रहेकाले त्यसको असर नेपालको आमसर्वसाधारण पर्नु स्वभाविक हो । त्यसैले अहिले आर्थिक क्षेत्रमा देखिएका अप्ठयारा र संकटलाई यसअघि पनि अर्थमन्त्री भइसकेका विष्णु पौडेलजीले समाधान गर्छन् भन्ने विश्वास छ ।’
गठबन्धनलाई लामो समयसम्म अगाडि बढाउने सोचेका थियौं तर त्यो कांग्रेस नेतृत्वको कमजोरी र माओवादी केन्द्रका अध्यक्ष पुष्पकमल दाहालको कारण हुन नसक्नु दुर्भाग्यपूर्ण कार्य भएको कोइरालाले बताए ।
‘माओवादी केन्द्रका अध्यक्ष दाहालले सुरुमा नै प्रधानमन्त्री बन्न चाहेको विषय पार्टी नेतृत्वलाई जानकारी गराइसको थिएँ, त्यसैले गठबन्धन टुट्नुमा कांग्रेस नेतृत्वको कमजोरी छ,’ उनले भने, ‘अब कांग्रेस प्रतिपक्षमा पुगेकाले सदन र सडक दुवै ठाउँबाट देश र जनताको हितमा काम गर्छ ।’
सरकारमा नजाँदैमा कांग्रेस खुम्चियो, कमजोर भयो भन्ने मानसिकता कसैलाई पनि नराख्न कोइरालाको भनाइ थियो ।
