मेयर बालेनले कार्यकक्षमा राखे ग्रेटर नेपालको नक्सा
काठमाडौं, 8 जुन 2023 | काठमाडौं महानगरपालिकाका मेयर बालेन शाहले आफ्नो कार्यकक्षमा ग्रेटर नेपालको नक्सा राखेका छन्। बिहीबार सभागृहस्थित रहेको मेयर बालेनको कार्यकक्षमा ग्रेटर नेपालको नक्सा राखिएको हो । भारतको नयाँ संसद भवनमा नेपाली भूमी समेटिएको ग्रेटर इन्डियाको नक्सा राखेपछि हामीले किन नराख्ने भनेर उनले कार्यकक्षमा राखेको बुझिएको छ ।
मेयरको कार्यकक्षमा ग्रेटर नेपालको नक्सा राखिएको बालेनका स्वकीय सचिवले जानकारी दिए । बालेन साह यतिबेला भारतको बैंगलोरमा छन् । उनको निर्देशनमा सचिवालयले ग्रेटर नेपालको नक्सा राखेको स्वकीय सचिवले बताए ।
‘नेपालको गर्विलो इतिहास छ । त्यो इतिहास झल्काउने नक्सा राखिएको हो । मेयर सापकै निर्देशनमा राखेका हौं ।’ स्वकीय सचिवले भने ।
बालेनले आफू स्वदेश फर्किएपछि सो नक्सा सार्वजनिक गर्ने योजना बनाएका छन् । भारतीय प्रधानमन्त्री नरेन्द्र मोदीले नयाँ संसद भवनमा नेपाली भूमिसमेत रहेको ‘अखण्ड भारत’को नक्सा राख्न लगाएपछि अहिले तीब्र विरोध भइरहेको छ । यो नक्सामा नेपालको लुम्बिनी र कपिलवस्तु समेत समावेश छ । यहाँको सरकारले भने यस विषयमा भारतीय पक्षसँग औपचारिकरुपमा कुरा उठाएको छैन् । प्रधानमन्त्री पुष्पकमल दाहाल प्रचण्ड हालको भारत भ्रमणमा पनि यस विषयमा कुरा उठाउन सकेनन् ।
हालै मात्र प्रतिनिधिसभाको बैठकमा राष्ट्रिय स्वतन्त्र पार्टीका सांसद विराजभक्त श्रेष्ठले नेपालको संसद भवनमा पनि ग्रेटर नेपालको नक्सा राख्न सुझाव दिएका थिए ।
ग्रेटर नेपालमा टिस्टादेखि पश्चिममा सतलजसम्मको भूभाग पर्दछ । अंग्रेससँग भएको सुगौली सन्धीबाट नेपालको भूभाग मेचीदेखि महाकालीसम्म सीमित गरिए पनि अहिले अंग्रेजहरुको इष्ट इण्डिया कम्पनी छैन् । सुगौली सन्धी पनि खारेज भइसकेको छ । तर सोही सन्धीअनुसारको भूभाग फिर्ता भइसक्नुपर्नेमा भारतले आफ्नो उपनिवेश बनाएर राखेको छ । तर नेपालका शासकहरुले भने आफ्नो भूमि फिर्ता लिन डराउँदै आएकोमा पछिल्लो समयमा ग्रेटर नेपालको कुरा चर्कोरुपमा उठन थालेको छ ।
