यूएई, २० जनवरी २०२०
वैदेशिक रोजगारीमा जाने , परिवारलाई खुसी दिने हरेक युवाहरुको सपना हुन्छ । यसरी परिवारको खुसीको खोजीमा विदेशतिर भौतारिने नेपालीको संख्या बर्सेनी बढ्दो क्रममा छ । तर, परिवारको खुसीका लागि विदेशी भूमिमा आफ्नो पसिना,श्रम बेच्न गएका नेपालीको जीवन अकालमै टुंगिरहेको अवस्था छ ।
संयुक्त अरब इमिरेट्स (युएई) मा बितेको सन् २०१९ मा मात्रै १०३ नेपालीेले ज्यान गुमाएका छन् । ज्यान गुमाउनेहरुमा ९९ जना पुरुष र ४ जना महिला रहेका छन् ।
कार्यस्थलदेखि दुर्घटनालगायतमा परेर युएईमा एक वर्षको अवधिमा १०३ ले ज्यान गुमाएको युएईस्थित नेपाली दूतावासले जनाएको छ । केही दिनअघि मात्रै अबुधाबीमा भएको सवारी दुर्घटनामा नेपाली परेका थिए । जसमा ३ को मृत्यु भएको थियो भने १६ जना घाइते भएका छन् ।
सन् २०१८ मा युएईमा ज्यान गुमाउने नेपालीको संख्या अझै बढीरहेको छ । नेपाली दूतावासका अनुसार, सन् २०१८ मा ९ जना महिलासहित ९८ जना पुरुषले ज्यान गुमाएका थिए ।
सन् २०१८ मा ३ महिला सहित ३० नेपालीले आत्महत्या गरेका थिए । यस्तै गतवर्ष २ जना महिला र ३ जना पुरुषको हत्या भएको दूतावासले जनाएको छ ।
पछिल्ला केही वर्षयता युवाहरू वैदेशिक रोजगारीमा जाने क्रम बढेको छ । वैदेशिक रोजगारीमा जाने अधिकांश युवाले खाडी मुलुकलाई गन्तव्य बनाउँदै आएका छन् । एक तथ्यांकअनुसार, युएईमा मात्रै २ लाख ५० हजार नेपाली युवा श्रम खर्चिरहेका छन् ।