नयाँ दिल्ली, 7 मे 2020
भारतमा रहेका नेपालीहरु भोकै मर्ने अवस्थामा पुग्दा समेत कुनै विकल्प बिना आफु रहेको ठाउँमा सुरक्षित रहन भनिरहेको नेपाली राजदूतावासका राजदूत निलाम्बर आचार्यले अब भने भारतमा रहेका नेपालीहरुलाई स्वदेश फर्काउनु पर्ने बताउनु भएको छ । बुधबार राती आफ्नो सामाजिक संजाल फेसबुक र ट्वीटर मार्फत राजदूत आचार्यले लकडाउन र नेपाल-भारत सीमाबन्दको अहिलेको अवस्थामा भारत प्रवासमा रहेका नेपाली मजदूर, विद्यार्थी, पर्यटक र अन्यको जीवन बढ्दो कष्टकर बन्दै गएको भन्दै नेपाल फर्कन चाहनेेलाई फिर्ता पठाउनुपर्ने भन्नुभएको छ ।
उहाँले लेख्नुभएको छ ” लकडाउन र नेपाल-भारत सीमाबन्दको अहिलेको अवस्थामा भारत प्रवासमा रहेका नेपाली मजदूर, विद्यार्थी, पर्यटक र अन्यको जीवन बढ्दो कष्टकर बन्दैछ। विपतको यो समयमा नेपाल फर्कन चाहनेहरूलाई फर्कने सुरक्षित वातावरण बनाउनुपर्छ।
सो नहुँदासम्म कष्टकठिनाई कम गर्ने हाम्रा प्रयास बढाउन हामी सजग छौं। ”
नेपालका केही संचार माध्यममा भारतमा नेपालीहरुलाई समस्या नरहेको र नेपाली दूतावासले स्थानिय प्रशासनसँग मिलेर उनिहरुलाई खानाको व्यवस्था गरिरहेको भनेपछि भारतमा रहेका नेपाली मजदूर र मिडियाले चर्को आलोचना गरेका थिए । भारतले तेस्रो पटक लकडाउन बढाएपछि पनि नेपाली दूतावासले गत वैशाख 22 अर्थात मे 4 मा एक अपील जारी गर्दै आफु रहेकै स्थानमा सुरक्षित रहन भनेको थियो ।
