काठमाडौं, 21 अक्टूबर 2022
नेपाली काँग्रेसका नेता प्रकाशमान सिंहले राजनीतिक स्थिरताविना विकास निर्माण सम्भव नभएको बताएका छन् । शुक्रबार काठमाडौँमा आयोजित वाम गठबन्धनको शुभकामना आदानप्रदान कार्यक्रममा बोल्दै उनले नेपाली जनताले देशमा स्थिरता कायम होस् भन्ने चाहेको बताए ।
उनले भने, ‘नेपालको राजनीतिक परिस्थितिबाट जनताको स्थिरताको लागि जुन चाहना छ, राजनीतिक स्थिरता कायम गर्नको लागि पनि गठबन्धनका उम्मेदवारहरुलाई जिताउन आवश्यक छ । अस्थिरता भयो भने विकास निर्माणको कुरा काल्पनिक हुन जान्छ ।’ देशमा राजनीतिक स्थिरता कायम गर्न गठबन्धनको विकल्प नभएको उनको भनाइ छ । राजनीतिक स्थिरताबाट नै देश समृद्धि र विकास हुनसक्ने भन्दै आगामी निर्वाचनमा गठबन्धनलाई जिताउन उनले आग्रह गरे । उनले राजनीतिक स्थिरता र स्थायित्व, संविधानको कार्यान्वयनको लागि गठबन्धन हार्नु नहुने बताए ।
