भैरहवा, 30 मार्च, गोविन्द पोखरेल
नेपाल-भारत बस सञ्चालन गर्दै आएका टूर एण्ड ट्राभल्सकै कारण सयौं नेपालीहरु अहिले अलपत्र परेको खुल्न आएको छ । कोरोना भाइरस महामारीलाई रोकथाम गर्नका लागि भारत र नेपाल सरकारले लकडाउन गरेका कारण कुनै पनि सवारी साधन चलेका छैनन । तर केही टूर एण्ड ट्राभल्सले मनोमानी ढंगले भारतमा रहेका नेपालीहरुलाई सीमामा अलपत्र पारेको खुल्न आएको छ ।
कोरोना भाईरसबाट बच्ने एकमात्र उपाय सामाजिक दूरी भएको भएपनि केवल पैसा कमाउने नाममा सयौं मानिसहरुको ज्यानलाई जोखिममा हाल्दै टूर एण्ड ट्राभल्सहरुले उनिहरुलाई अलपत्र पारेका छन ।
लकडाउन भएको एक हप्ता नाघ्दा समेत अहिले सीमामा भारतका विभिन्न स्थानबाट सयौंको संख्यामा नेपालीहरु पुगेका छन । नेपाल सरकारले उनिहरुको क्वारेन्टाइनको व्यवस्था नगरेकाले नेपाल प्रवेश गर्न नदिने भनिहरेको छ । भारत सरकारले सबैका लागि लकडाउन लगाएको अवस्थामा हरेक व्यक्तिहरु घरमै रहेको अवस्थामा सीमामा नेपालीहरु अलपत्र पर्नुमा केवल टूर एण्ड ट्राभल्स जिम्मेवार भएको नेकपाका केन्द्रीय कार्यालय सचिव गोपाल थापाले बताउनु भएको छ ।
टूर एण्ड ट्राभल्स वालाहरुले नेपाली दूतावास, नेपाल सरकारको गृह मन्त्रालय र भारत सरकारको अनुमति बिना एउटै बसमा 105 जनाभन्दा धेरै यात्रु बोकेर सयौं नेपालीहरुलाई सुनौली नाकामा पुऱ्याएको थापाले बताउनु भयो ।
थापाले यद्धपी सीमामा फसके नेपालीहरुको व्यवस्थापन कसरी गर्न सकिन्छ भन्ने विषयमा सम्बन्धित निकायमा छलफल चलिरहेको थापा बताउनु हुन्छ । त्यसैगरि नेकपाका भारत प्रवास संयोजक लोकनाथ भण्डारीले यस्ता गैर जिम्मेवार ट्राभल्सवालाहरुको परमिट खारेज गर्न पहल गर्ने समेत बताउनुभयो ।
दिल्लीस्थित नेपाली राजदूतावास र नेपाल सरकारको जानकारी बिना उनिहरुलाई सीमामा अवपत्र पारेकाले उनिहरुलाई नेपाल पस्न दिन नसक्ने जिल्ला प्रशासन कार्यालय रुपन्देहीले भनेको छ । साथै उनिहरुको खाने-व्यवस्थाको जिम्मा पनि उनिहरुलाई लिएर आउने टूर एण्ड ट्राभल्स वालाले गर्नुपर्ने बताएको छ ।
कसरी हुन्छ त अलपत्र परेकाहरुको व्यवस्थापन ?
लकडाउनबारे भारत सरकारको सर्कुलर, दिल्लीस्थिल नेपाली दूतावास र विभिन्न नेपाली संगठनहरुको विज्ञप्तिका साथै नेशनल लाईवले पनि समाचार मार्फत पटक-पटक लकडाउन पालना गरि समस्यामा नपर्न नेपालीहरुलाई आग्रह गर्दै आएको भएपनि टूर एण्ड ट्राभल्सको लालचका कारण करिब 4 सय जना नेपालीहरु सुनौली सीमा नजिक रोडवेज डिपोमा अलपत्र परेका छन । उनिहरु मध्ये अधिकांश अर्घाखाँची, रुपन्देही, पाल्पा, गुल्मी, नवलपरासी र कपीलवस्तु लगायतका ठाँउका वासिन्दा छन । उनिहरु त्यहाँ 2 दिनदेखि अलपत्र परेका छन। उनिहरुलाई खानापिनाको समस्या छ ।
जेसुकै भए पनि अन्ततः उनिहरु नेपाली भएकाले उनिहरुलाई मर्नका लागि पनि त्यसरी छोड्न नहुने नेजस उत्तर भारतकी अध्यक्ष सुनिता जीसी कुँवर बताउनुहुन्छ । उनिहरु 14 दिनको क्वारेन्टाइमा बस्न तयार भएकाले उनिहरुलाई सीमा भित्र पस्न दिएर उनिहरुलाई बचाउनुपर्ने कुँवरले बताउनुभयो ।
हुन त कुनै पनि मानिसले आफुलाई आफ्नो घरभन्दा पर कहिलै सुरक्षित ठान्दैन। तर कोरोनाको रोकथामका लागि पुरै विश्वलेनै सतर्कता अपनाएका बेला नेपाल सरकारले गरेको कडाईमा तपाई-हामीले साथ दिनु अत्यावश्यक छ । यसले तपाई-हामीलाई मात्रै नभएर हाम्रो गाँउ, शहर र देशलाई यस विषम परिस्थितिबाट बचाउनेछ ।
हामी नेशनल लाईव मार्फत फेरि पनि सबै नेपालीहरुलाई आफु रहेकै ठाँउमा सुरक्षित रहन पुनः आग्रह गर्दछौं ।
