बिजनबारी, 6 मार्च 2020/ सन्जय निरौला
वरिष्ठ रङ्गकर्मी खगेन्द्रमणि दिक्षितको 81 वर्षको उमेरमा निधन भएको छ। दार्जिलिङमा उपचारको क्रममा निधन हुनुभएका उहाँको साकफारा बिजनबारीमा अन्तिम संस्कार गरिएको हो। लामो समयदेखि नेपाली सिने जगतमा लागि पर्नुभएका स्वर्गीय दिक्षितले धेरै पहिले दार्जीलिङे नेपाली सिनेमा परालको आगोमा मुख्य नायकको भुमिका समेत निभाउनु भएको थियो भने साठी तथा सत्तरीको दशकमा दार्जीलिङबाट मन्चित अंधिकाश नाटकहरुमा उत्कृष्ट अभिनय गर्नुभएको थियो।
उहाँले नाटक र सिनेमामा दिएको दीर्घकालीन योगदानलाई सम्मान गर्दै गोर्खाल्याण्ड क्षेत्रीय प्रशासनले यस वर्षको अगमसिंह गिरी पुरस्कारले सम्मान गर्ने घोषणा गरेको थियो। सो पुरस्कार आगामी 13 अप्रेल 2020-का दिन दिने भनिएको थियो तर भाग्यको लेखान्त सो पुरस्कार लिन उहाँ आफै उपस्थित हुन पाउनुभएन।
पेशाले दार्जीलिङ पुलबजार खण्ड कृषि विभाग अधिकारीको रूपमा लामो समयमा कार्यरत रहेर सेवानिवृत बन्नु भएका दिक्षित लामो समयदेखि शारीरिक रोगले थलिएका थिए भने उहाँको निधनले एक महान हस्तिको अन्त्य भएको छ।
