काठमाडौं, 5 फरवरी 2022
नेकपा (एमाले)का वरिष्ठ उपाध्यक्ष ईश्वर पोखरेलले देश विकास गर्ने जनताको सपनालाई सत्ता गठबन्धनले मूर्छित पार्ने काम गरेको आरोप लगाउनुभएको छ । प्रेस चौतारी नेपालको स्थापना दिवसका शनिबार काठमाडौंमा आयोजना गरेको कार्यक्रममा उहाले गठबन्धन सरकारले पूर्वाधार निर्माण लगाएतका कामहरु रोकेको भन्दै बिकासको सपनालाई मूर्छित पार्ने काम गरेको आरोप लगाउनुभएको हो । एमालेलाई समाप्त गर्ने बिषाक्त बिचार बोकेर निर्माण भएको गठबधनलाई राष्ट्रिय स्वाभिमान र स्वतन्त्रताका मुद्धामा कुनै चासो नै नरहेको उहाले बताउनुभयो । पोखरेलले बर्तमान सरकार बनेपछि कालापानी र लिपुलेकलाई पनि अपनत्व दिन नसकेको तर्क गर्नुभयो । एमालेले संघीयताको बलियो कार्यान्वयन चाहको भन्दै उहाले संघीयता नचाहनेहरुलाई लिएर गठबन्धन दल अघि बढेको बताउनुभयो । स्थानीय तहको चूनावको मिति घोषणा नगरेर परमादेश सरकारले संविधान र कानून उलंघन गरेको उहाको भनाई छ । उहाले स्थानीय तहको निर्वाचन समयमै नगराए जनपरिचालन गर्ने चेतावनी दिनुभयो । प्रेस चौतारी नेपालले २४औं स्थापना दिवसका अवसरमा विभिन्न व्यक्तिलाई पुरस्कार दिने घोषणा पनि गरेको छ । प्रेस चौतारी नेपाल ०५५ सालमा स्थापना भएको हो ।
