काठमाडौं, 3 मार्च 2023
नेपाली कांग्रेसका महामन्त्री विश्वप्रकाश शर्माले विगतलाई हेक्का राखेर नयाँ राष्ट्रपतिले काम गर्नुपर्ने बताएका छन् । विराटनगरमा शुक्रबार आयोजित प्रदेशसभा सांसदसँगको अन्तरक्रिया कार्यक्रममा उनले विगतमा राष्ट्रपति विवादमा पर्नुको कारणलाई हेक्का राखेर नयाँ राष्ट्रपतिले काम गर्नुपर्ने बताएका हुन् । यही फागुन २५ गते राष्ट्रपति निर्वाचनका लागि मतदान हुँदैछ। ८ दलीय समर्थनमा नेपाली कांग्रेसका वरिष्ठ नेता रामचन्द्र पौडेल र नेकपा एमालेबाट नेता सुवास नेम्वाङ राष्ट्रपति पदका लागि उम्मेदवार छन्। शर्माले राष्ट्रपति विद्यादेवी भण्डारीको कार्यकालमा भएका कमजोरीका कारण सेरेमोनियल राष्ट्रपति चुनावमा पनि यसपटक धेरै सक्रियता देखाउनुपरेको बताएका छन्। महामन्त्री शर्माले भने, ‘सेरेमोनियल राष्ट्रपतिका लागि यतिधेरै नोकझोक, दौडधुप किन भनेर पनि साथीहरू सोधिरहनु भएको छ। यसअघिको कार्यकालको समीक्षाको जगमा यसको पृष्ठभूमि खोज्नुपर्छ।’ संसद विघटनदेखि नागरिकता विधेयक रोकिएकोसम्म हेर्नुपर्ने उनले बताए। विगतका राष्ट्रपति के कारणले विवादमा परे भन्ने हेक्का गरेर नयाँ राष्ट्रपति अघि बढ्नुपर्ने उनले बताए। उनले ८ दलको समर्थन भएकोले राष्ट्रपतिमा पौडेल निर्वाचित हुने पनि दाबी गरेका छन्।
