काठमाडौं, 28 मार्च 2022
नेपाली कांग्रेसका नेता प्रकाशमान सिंहले शिक्षा क्षेत्रमा चरम राजनीति भएकाले बिकास हुन नसकेको बताउनुभएको छ । सोमबार काठमाडौंमा कन्या मन्दिर माध्यमिक बिद्यालयको हीरक जयन्ती समारोहलाई सम्बोधन गर्दै नेता सिंहले शिक्षा क्षेत्रको बिकासका लागि राजनीतिक हस्तक्षेपमुक्त बनाउनुपर्ने बताउनुभयो । शिक्षा क्षेत्रको बिकासका लागि नारा दिएर मात्र नपुग्ने भएकाले मौका पाउदा काम गरेर देखाउनुपर्ने उहाले बताउनुभयो । नेता सिंहले संविधानमा उल्लेख आधारभूत स्वास्थ्य र गुणस्तरीय शिक्षामा सबै नागरिकको समान पुग्न नसकेको भन्दै यसमा सबैको ध्यान जानुपर्ने उल्लेख गर्नुभयो । त्यस्तै उहाले जनताको संघर्षबाट प्राप्त परिवर्तनलाई संस्थागत गर्न मिलेर अघि बढ्नुपर्ने धारणा राख्नुभयो । कार्यक्रममा बिद्यालयका कर्मचारी, शिक्षक लगाएतलाई सम्मान गरिएको थियो ।
