काठमाडौं, 23 दिसम्बर 2022
नेकपा एमालेका महासचिव शंकर पोखरेलले मुलुकमा राजनीतिक अस्थिरता र अराजकता सिर्जना हुँदै गएको बताएका छन् । शुक्रबार नेपाल पत्रकार महासंघको साधारणसभालाई सम्बोधन गर्दै महासचिव पोखरेलले मुलुकमा अब बलियो राष्ट्रिय शक्तिको आवश्यकता रहेको बताए । उनले यो जनादेशले मुलुकलाई सहि बाटोमा अघि बढाउन नसक्ने समेत बताए । वामपन्थीहरु एकजुट हुन आवश्यक रहेको बताउँदै उनले भने, ‘सत्तारुढ गठबन्धनले पनि जनादेश गुमाएको छ प्रतिपक्षले पनि सफलता पाउन सकिरहेको छैन । वामपन्थीहरु एक ठाउँमा उभिन आवश्यक छ। यो नै मुलुकको लागि फाइदाजनक हुन्छ। गठबन्धन समाधान होइन, गठबन्धनबाट भविष्य निर्माण हुँदैन ।’ उनले दलहरू असफल भएको समेत बताए । उनले भने, ‘इतिहासबाट पाठ लिउँ तर भारी नबोकौँ । भविष्य कस्तो बनाउने भन्ने कुरामा ध्यान दिन आवश्यक छ।’ महासचिव पोखरेलले राज्य सञ्चालनमा स्वार्थको सौदाबाजी भइरहेको समेत बताउँदै नयाँ जनादेशलाई सम्मान गर्ने कुरामा साझा दृष्टिकोण बनाउनुपर्नेमा जोड दिए । नेपाली राजनीतिमा विश्व राजनीतिको प्रभाव पर्दै गएको बताउँदै उनले यो बारेमा सुझबुझ राख्नुपर्ने बताए । उनले भने– ‘विश्व राजनीतिको प्रभाव नेपाली राजनीतिमा परिरहेको छ भन्ने कुरा किन हामीले बुझ्दैनौँ ?’ पोख्रेलले नेपाली पत्रकारिता क्षेत्रले जुन मान्यताबाट अघि बढ्नुपर्ने हो त्यसबाट विचलित भएको बताए । उनले राष्ट्रपतिप्रति प्रयोग गर्ने भाषामा नेपाली सञ्चारमाध्यमले एउटै भाषा प्रयोग गरिरहेकामा असन्तुष्टि व्यक्त गरे ।
