सभापति देउवाकै कारण पार्टीमा समस्या बढेको थापाको आरोप
काठमाडौं, 2 जुन 2023
नेपाली कांग्रेसका महामन्त्री गगन थापाले पार्टी सभापति शेरबहादुर देउवाकै कारण पार्टीमा समस्या बढेको आरोप लगाएका छन् । काठमाडौंमा आयोजित प्रेस युनियनको उपत्यका तथा प्रतिष्ठान प्रदेशको प्रथम अधिवेशनमा उनले सभापति देउवाले आफ्नो मर्जीले बैठक बोलाउने गरेको आरोप लगाए । सभापति देउवाले विभाग गठन गर्न पनि चासो नदिएको उनको भनाई छ ।
‘नेपाली कांग्रेसको बैठक राख्न दबाब छ । तर, मैले बोलाउने होइन । अहिले केही दिनअघि मात्रै एउटा विभाग गठन भएको छ । विभाग गठन गर्ने सबै जिम्मेवारी पार्टीको विधानले सभापतिलाई दिएको छ । अस्ति उहाँलाई मन लागेको थियो गर्दिनुभयो । अहिले उहाँलाई मन लागेको छैन गर्नुभएको छैन ।’ उनले भने, ‘कलम भित्र राख्नुभएको छ निकालेर उहाँले हस्ताक्षर गरे विभाग बन्छ । तर, हामी समस्या कहाँ छ, बोल्न डराउँछौं ।’
साथै महामन्त्री थापाले रेशम चौधरीको आममाफी र नागरिकता विधेयक प्रमाणीकरण जस्ता विषय पार्टी सभापतिको एकल सहमतिमा भएको दाबी पनि गरे।
