काठमाडौं, 18 मई 2023
प्रधानमन्त्री पुष्पकमल दाहालले समयमै मल उपलब्ध गराउन भारत सरकारसँग मल खरिदको सम्झौता भइसकेको बताएका छन्।
बिहीवार प्रतिनिधि सभा बैठकमा प्रतिनिधि सभा सदस्य अनिता देवीको प्रश्नको जवाफ दिँदै प्रधानमन्त्री दाहालले भारत सरकारसँग मल खरिदको सम्झौता भइसकेको बताएका हुन्।
उनले यस वर्ष समयमै मल, बिउ उपलब्ध गराउन सम्बन्धित मन्त्रालयलाई निर्देशन दिएको पनि बताए।
उनले भने, ‘सर्वसुलभ तरिकाले रासायनिक मल उपलब्ध गराउन, रासायनिक मलमा अनुदान दिनुकोसाथै भारत सरकारसँग मल खरिदको सम्झौता भइसकेको जानकारी गराउन चाहन्छु। यस वर्ष समयमै मल, बीउ उपलब्ध गराउन मैले बेलैमा कृषि मन्त्रालय लगायत सम्बन्धित मन्त्रालयलाई निर्देशन दिइसकेको छु। र कृषि मन्त्रालयबाट यस सम्बन्धी कार्य अगाडी बढी पनि सकेको छ। यस वर्षको नीति, कार्यक्रम र बजेटमा कृषिलाई र किसानहरुको हीतलाई अनि उत्पादन र रोजगारी सृष्टिको कुरालाई उच्च प्राथमिकता दिइने कुरा पनि म जानकारी गराउन चाहन्छु।’
नेकपा एमालेका सांसद रघुजी पन्तले बैठकमा ‘तपाईको भारत भ्रमणका क्रममा इपिजी प्रतिवेदन दुवै बुझने काम हुन्छ की हदैन?’ भन्दै प्रधानमन्त्री दाहाललाई प्रश्न गरेका थिए।
उनको प्रश्नको जवाफ दिदै प्रधानमन्त्रीले भने, ‘यो त भारत भ्रमणमा गएर कुरा गरेपछिको परिस्थितीमा मात्र भन्न सकिन्छ।’ प्रधानमन्त्री दाहालले यसमा थपे, ‘हामीले एक इन्च जमिन पनि छोड्न सक्दैनौ, हामीलाई छिमेकीको एक इन्च जमिन पनि चाहिदैन। यो कुरामा हामी सबै दल एकमत छौं।’ सांसद पन्तले कालापानी, लिम्पियाधुरा र लिपुलेखको जमिन फिर्ता ल्याउने कार्यसूची छ की छैन भन्ने प्रश्नमा उल्लेखित जवाफ दिएका थिए।
प्रधानमन्त्री दाहालले आफ्नो भारत भ्रमणका क्रममा राष्ट्रिय हित र अखण्डतामा आँच आउने कुनैपनि काम नहुने दाबी समेत गरे।