काठमाडौं, 28 सितंबर 2022
नेपाली कांग्रेसमा समानुपातिक सूचीमा असन्तुष्टि जनाउँदै आएको डा शेखर कोइराला समूहले पार्टी कार्यालयमा धर्ना दिएको छ। डा शेखर पक्षका नेताहरुले पार्टी कार्यालय सानेपामा बुधवार धर्ना दिएका हुन्। कांग्रेसले निर्वाचन आयोगमा बुझाएको समानुपातिक बन्दसूचीप्रति असन्तुष्टि जनाउँदै आएको कोइराला पक्षले समान अवसर र न्यायको माग गर्दै पार्टी कार्यालयमा धर्ना दिएको हो । उनीहरु पार्टी कार्यालय अगाडि एक घण्टासम्म मौन धर्नामा बसेका हुन् । समानुपातिक बन्दसूची सच्याउन र आफ्नो पक्षलाई प्रत्यक्षतर्फ न्यायोचित सिट दिन काइराला पक्षको माग छ । आगामी ४ मंसिरमा हुने प्रतिनिधिसभा र प्रदेशसभा निर्वाचनको प्रत्यक्ष तथा समानुपातिक तर्फको उम्मेदवारमा सिफारिस भएका र उम्मेदवार बन्न आकांक्षा राखेका नेताहरु धर्नामा सहभागि थिए । संस्थापन पक्षले समानुपातिक बन्दसूची बनाउँदा एकलौटी गरिएको भन्दै कोइराला पक्षले गत शुक्रवारदेखि विरोध जनाउँदै आएको छ । समानुपातिक बन्दसूची नसच्चिए निर्वाचन बहिस्कारसम्म जाने कोइराला पक्षको चेतावनी छ । कोइराला पक्षको विरोधपछि समानुपातिक बन्दसूची सच्याउने सकिने सभापति शेरबहादुर देउवाले आश्वासन दिएका थिए । कोइराला पक्षले ४० प्रतिशत आफूले पाउनुपर्ने माग गर्दै आएको छ। यसै विषयमा पार्टीको ध्यानाकर्षण गराउन पटक-पटक भेला तथा छलफलसमेत आयोजना गरेको थियो।
