काठमाडौं, 28 दिसम्बर 2022
सत्ता साझेदार दलका शीर्ष नेताको बैठक भोलि बालुवाटारमा बस्ने भएको छ । प्रधानमन्त्री पुष्पकमल दाहाल प्रचण्ड र एमालेका अध्यक्ष केपी शर्मा ओलीबीच भएको वार्तामा भोलि बालुवाटारमा शीर्ष नेताको बैठक बस्ने विषयमा कुराकानी भएको थियो ।
प्रचण्डका स्वकिय सचिव रमेश मल्लका अनुसार सरकार निर्माणपछि नीति तथा कार्यक्रम र सरकारको प्रभावकारिताका सम्बन्धमा दुई नेताबीच छलफल भएको थियो।
“भोलि फेरि बालुवाटारमा कुरा गर्नेगरी टुंगिएको छ । भोलिको बैठकमा सत्ता साझेदारका सम्बन्धमा छलफल गरिने भएको छ,” उनले भने ।
यसैबीच प्रधानमन्त्री दाहालले नेकपा एकीकृत समाजवादीका अध्यक्ष माधवकुमार नेपालसँग पनि कुराकानी गरेका छन् । बिहान भएको छलफलमा सरकारलाई समर्थन गर्न आग्रह गरेका छन् ।
छलफलमा नेता नेपालले पार्टीमा छलफल गरेर निर्णय दिइने बताएका थिए ।
“माधवकुमार नेपालसँग पनि कुरा भएको छ । सरकारलाई समर्थन दिने विषयमा प्रधानमन्त्रीले आग्रह गर्नुभएको छ । उहाँहरुले सल्लाह गर्छौँ भन्नुभएको छ,” मल्लले भने ।
