काठमाण्डौँ, 7 मार्च 2020
ग्रील तथा स्टील व्यवसायी महासंघका अध्यक्ष मोहन कटुवालले सरकारी नीति नियम पालना गरेर व्यवसायलाई मर्यादीत बनाउनुपर्ने आवश्यकता औल्याउनुभएको छ। संघ अन्तर्गत रहेको काठमाडौं पश्चिम क्षेत्रको पाँचौ साधारण सभालाई सम्बोधन गर्दै कटुवालले सरकारले अघि सारेका सामाजिक सुरक्षा कोष, न्यूनतम पारिश्रमिक, प्यानकार्ड अनिवार्य लगातका नीतिहरु पालना गरेर व्यवसायलाई सम्मानित र मर्यादित बनाउनुपर्ने आवश्यकता औलाउनुभएको हो। सरकारी नीतिहरु कार्यान्वयन गर्नुपर्ने बाध्यात्मक अवस्था भएपनि समस्याहरु अझै रहेको उहाँले बताउनुभयो। सानो व्यवसाय, छरिएर रहेका व्यवसायी र सरकारले ओझेलमा पारेको व्यवसायका कारण तत्काल ती नीतिहरु पालना गर्न सकिने अवस्था नरहेको उहाँले बताउनुभयो।
अध्यक्ष कटुवालले व्यवसायको व्यवस्थापन, पूँजी, बजार समस्या समाधान र प्रविधि परिवर्तन गरी अगाडी बढ्न सबै व्यवसायीहरुलाई आग्रह गर्नुभयो। व्यवसायलाई समयसापेक्ष बनाउन नसक्दा ओझेलमा परिएको पनि उहाँले बताउनुभयो। गुणस्तरिय सेवा प्रदान गर्दै वैद्य तरिकाले सम्मानित पेशा बनाउनुपर्ने अहिलेको आवश्यकता रहेको उहाँले बताउनुभयो।
