काठमाडौं, 14 फरवरी 2023
सरकार र आन्दोलनमा उत्रिएका यातायात मजदुरबीच पाँच बुँदे सम्झौता भएको छ । भौतिक पूर्वाधार तथा यातायात मन्त्रालयमा मंगलबार भएको वार्तापछि सरकार र यातायात मजदुर संगठनहरुले पाँचबुँदे सम्झौता गरेका छन् । सरकार र मजदुर संगठनहरुबीच काठमाडौं उपत्यकाबाट बाहिर सञ्चालन हुने सवारी साधनका सम्बन्धमा उठेका विषयमा माघ २९ मा गठित यातायात सुधार कार्यदलको प्रतिवेदन प्राप्त नहुन्जेलसम्म यातायात सुरु सञ्चालनको व्यवस्थापनका लागि सम्बद्ध निकायलाई अनुरोध गर्ने सहमति भएको छ । त्यस्तै, हिजो गोंगबु नयाँ बसपार्कमा मजदुरले गरेको कार्यक्रममा भएको घटना दुःखद रहेको भन्दै लुटपाट तथा आक्रमणमा संलग्न दोषीलाई कारबाही गर्ने र आन्दोलनका क्रममा पक्राउ परेका निर्दोष व्यक्तिलाई तत्काल रिहाइ गर्ने सहमति भएको छ ।
वार्तामा सहभागी यातायात व्यवसायीहरुकाअनुसार यसअघि बनेको कार्यदलले यातायातसँग सरोकार राख्ने सबै सम्बद्ध पक्षसँग छलफल गरी सुझाव लिने, र माघ २९ मा गठित यातायात सुधार कार्यदलमा सरोकारवाला सम्बद्ध महासंघ,संघ र संगठनका प्रतिनिधिहरूलाई आवश्यकताअनुसार आमन्त्रण गर्ने र निष्कर्षपछि मात्रै अघि बढ्ने सहमति भएको छ ।
