काठमाडौं, 4 अक्तूबर 2021
सांसदहरुले नेपालमा विवाह गर्न पाउने उमेरको प्रावधानको बिचार गर्नुपर्ने बेला आएको बताएका छन् । सोमबार प्रतिनिधिसभाको कानुन, न्याय तथा माधव अधिकार समितिको वैठकमा उनीहरुले विद्यमान कानुनमा शारीरिक सम्पर्कका लागि १८ बर्ष र विवाहका लागि २० बर्ष उमेर तोकिनुमा समस्या रहेको भन्दै यस्तो प्रावधानमा बिचार गर्नुपर्ने बेला आएको बताएका हुन् । कानुनले १८ वर्षमा वालिग हुने व्यवस्था गरिसकेपछि विवाह गर्नका लागि उमेर हद तोकिरहनु नपर्ने उनीहरुको भनाई छ । बैठकमा सांसद मातृका यादवले मुलुकी देवानी संहिता–२०७४ मा केटा र केटी दुवैका लागि विवाह गर्ने उमेर २० वर्ष रहेको भन्दै बिवाहको उमेर १८ बर्ष राख्नुपर्ने धारणा राख्नुभयो । त्यस्तै उहाले लिभिङ टुगेदरलाई अस्थायी रुपमा दर्ता गर्नुपर्ने बताउनुभयो । त्यस्तै सांसद मीन विश्वकर्माले लिभिङ टुगेदर समस्या बन्दै गएको र बलात्कार सम्बन्धी कानुनी प्रावधान स्पष्ट नहुँदा समस्या देखिएको बताउनुभयो । उहाले अब बिबाहको उमेर १८ मा झार्नुपर्ने उल्लेख गर्नुभयो । शारीरिक सम्पर्कका लागि १८ बर्ष र विवाहका लागि २० बर्ष उमेर तोकिनुले समाजमा बिकृती उत्पन्न भएको हुन सक्ने उहाको भनाई छ । त्यस्तै सांसदहरुले बलात्कार सम्बन्धी कसुर तथा सजाय सम्बन्धी विद्यामान कानुनमा परिमार्जन आवश्यक रहेको धारणा राखेका थिए । समितिले बलात्कार सम्बन्धी कसुर तथा सजाय सम्बन्धी विद्यामान कानुनी व्यवस्थाबारे छलफल गरेको हो ।
