नयाँ दिल्ली, 26 अगस्त, हेमन्त जोशी
साउदी अरबमा रोजगारविहीन भएर अलपत्र परेका 5 जना नेपाली मध्ये सुदूरपश्चिमका एक जना नेपाली स्वदेश फर्कन पाउने भएका छन । 5 जना मध्ये बाजुरा बुढीगंगा नगरपालिका वडा न. 10 का नरबहादुर रावलका लागि नेपाल र भारतबाट आर्थिक संकलन गरि पठाइएपछि उनि नेपाल फर्किन पाउने भएका छन ।
नेशनल लाईभले उनिहरुलाई लाईभमा जोडेर उनिहरुको समस्या जस्ताको तस्तै देखाएपछि भारत र नेपालमा रहने नेपालीहरुले बाजुराका नरबहादुर रावलका लागि आर्थिक सहयोग संकलन गरि पठाएका हुन ।
भारतमा हेमन्त जोशी र राजन रावत, भीम रावलको नेतृत्वमा 50 हजार 5 सय भारु र नेपालमा खगेन्द्र सिंह, जगत शाही, रुगम रावल, तपेश रावलको नेतृत्वमा 35 हजार नेरु संकलन गरेपछि साउदीमा रहेका बाजुराका नरबहादुर रावलको खातामा पठाइएको छ । रावलले पैँसा पाएपछि सहयोग गर्ने सबैप्रति आभार प्रकट गरेका छन । आर्थिक सहयोग संकलन अभियानमा सबैभन्दा पहिला चेतराज जोशीले सहयोग गरेपछि अभियान शुरु भएको थियो।
उनिहरु करिब डेढ वर्ष अघि साउदी अरब रोजगारीका लागि गएका थिए। काठमाडौंको मिता म्यानपावर कम्पनीबाट साउदी अरब काम गर्न गएका नेपालीहरु पछिल्लो 6 महिनादेखि रोजगारविहीन भएका कारण भोक-भोकै रहने अवस्थामा पुगेका थिए। साउदी अरबको जेद्दा जिल्लाको अलखुम्रास्थित एआईजी नामक कम्पनीमा कार्यरत बाजुरा बुढीगंगा नगरपालिका वडा न. 10 का नरबहादुर रावल, खोटाङ जन्तेढुंगा गाँउपालिका वडा न. 9 का दिनेश भुजेल, दाङका भुवनेश्वर शर्मा, रोल्पाका तिलक डाँगी र काभ्रेपलान्चोकका चन्द्रमान बोम्जन अहिले रोजगारविहीन भएपछि अलपत्र परेका थिए । नेपाली दूतावास र म्यानपावर कम्पनीमा उनिहरुले सहयोगको गुहार लगाए पनि कुनै सुनुवाई नभएपछि नेशनल लाईभका माध्यमबाट सहयोगको अपील गरेका थिए ।