काठमाडौं, 18 अक्तूबर 2021
माल्दिभ्समा आयोजना भएको साफ च्याम्पियनसिप फुटबलमा उपविजेता बनेको नेपाली राष्ट्रिय फुटबल टिम स्वदेश फर्किएको छ । सोमबार बिहान स्वदेश फर्किएको नेपाली टोलीलाई खेलकुद मन्त्री महेश्वर गहतराज तथा अखिल नेपाल फुटबल संघ (एन्फा) का पदाधिकारी लगायतले भव्य स्वागत गरे । नेपाली टोलीलाई स्वागत गर्न ठूलो संख्यामा फुटबल समर्थकहरु विमानस्थल पुगेका थिए । मालेमा शनिबार राति भएको फाइनलमा नेपाल भारतसँग ३–० ले पराजित भएको थियो । फाइनलमा पराजित भएपछि नेपाल ऐतिहासिक उपाधि जित्नबाट बन्चित भएको थियो । तर, नेपाल पहिलो पटक साफको उपविजेता बनेको हो । स्वदेश फकिएपछि नेपाली टोलीका कप्तान किरण कुमार चेम्जोङले उपाधि जित्नबाट बञ्चित भए पनि अहिलेको प्रदर्शनका आधारमा खेलाडीहरुलाई आगामी अन्तर्राष्ट्रिय प्रतियोगितामा खेल्न थप हौसला मिलेको बताउनुभयो । उहाले लगातार दुई गोल हुँदा खेलाडीको मनोबल पनि कमजोर भएको तर्क गर्नुभयो । उहाले नयाँ खेलाडीहरुलाई पनि अहिलेको अनुभवले आगामी दिनमा सहज हुने बताउनुभयो । किरणले फाइनमा प्रशिक्षक र अञ्जन बिष्टको अभाव देखिएको पनि बताउनुभयो । त्यस्तै खेलकुदमन्त्री गहतराजले नेपाली राष्ट्रिय फुटबल टिमको प्रदर्शनबाट गौरबको अनुभव भएको बताउनुभयो । नेपालको खेलबाट सरकारले आशा र भरोषा गरेको उहाको भनाई छ । मन्त्री गहतराजले खेलकुद क्षेत्रको बिकासका लागि सरकारले कुनै कसर बाँकी नराख्ने धारणा राख्नुभयो । नेपाललाई फाइनलसम्म पुर्याउन सफल मुख्य प्रशिक्षक अब्दुल्लाह अल्मुताइरीले भने नेपाल फर्कनुभएन । नेपालले फाइनलमा स्थान बनाएलगत्तै अलमुताइरीले साफ च्याम्पियनसिप सकिएपछि नेपाल छाड्ने घोषणा गर्नुभएको थियो । अलमुताइरी गत चैतमा एक वर्षको लागि नेपालको प्रशिक्षक नियुक्त हुनुभएको थियो।
