सिलगढी, 30 मार्च, रुबेन गुरुङ
उत्तर बंगाल मेडिकल कलेज एवं अस्पतालमा आज बिहानै एक महिलाको कोविड-19 का कारण मृत्यु भएपछि अहिले दार्जीलिङ पहाडको कालेबुङमा रहने उनको पुरै परिवार क्वारेन्टाइनमा रहेको छ ।
परिवारका एक सदस्य अजय सिंहले आफुहरुले परिवारको एक सदस्य गुमाएकोमा दु:ख प्रकट गर्दै अहिले सम्पुर्ण परिवार नै क्वारेन्टाइनमा रहेको बताउनु भएको छ। सामाजिक हितको निम्ति आफुहरु अहिले कसैसँग सम्पर्क नगरी लगातार एकल वासमा बसिरहेका जानकारी गराउदै भोइस म्यासेज जारी गर्नुभयो। उहाँले यस्तो जटिल स्थितिमा जीटीए अध्यक्ष अनित थापाले आफुहरुलाई लगातार फोन मार्फत सम्पर्कमा रहेर मद्दत गरिरहेको बताउदै उहाँप्रति आभार प्रकट गर्नुभयो ।
कोरोना भाईरसबाट संक्रमित कालेबुङकी 44 वर्षीया महिलाको सोमबार बिहानै 2 बजे सिलगढीस्थित नर्थ बंगाल मेडिकल कलेज एवं होस्पिटलमा निधन भएको थियो । ती महिला भर्खरै छोरीको उपचार गराई चेन्नैईबाट फर्किएकी थिइन ।
उनको निधनसँगै पश्चिम बंगालमा कोविड-19 का कारण ज्यान गुमाउनेको संख्या 2 पुगेको छ ।
