नयाँ दिल्ली, 6 जुन 2020
भारतले चीनसँगको सीमा समस्या समाधानका लागि चिनीया पक्षसित सहमति गरेपछि नेपालले पनि भारतसँगको सीमा विवाद समाधानका लागि विदेश सचिव स्तरीय वार्ताको प्रस्ताव गरेको छ ।
भारतीय सञ्चारका माध्यमका अनुसार नेपालले भिडियो कन्फ्रेन्सका माध्यमले नेपाल भारतबिच सीमा विवादबारे विदेश सचिव स्तरीय वार्ताको प्रस्ताव गरेको हो । यद्दपी भारतीय सञ्चार माध्यमका अनुसार भारत अहिलेनै वार्तामा बस्ने सम्भावना छैन । नेपालले आगामी साता संसदबाट निशान छाप सम्बन्धि दोस्रो संविधान संशोधन विधेयकलाई स्वीकृत गर्ने तयारी गरेकाले त्यसअघि भारतसँग पनि संवाद गर्ने तयारी गरेको हो ।
नेपालले यसअघि पनि सीमा विवादलाई कुटनीतिक रुपमा समाधान गर्नुपर्ने भन्दै भारतसँग वार्ताको लागि जोड दिएको थियो तर भारतले यो विषयलाई कोरोना महामारीपछि समाधान गर्ने भन्दै आएको छ । भारतले कोरोना महामारीकै क्रममा शनिबार मात्रै सैन्य स्तरमा छलफल गरि समाधानका लागि सहमति गरेपछि नेपालले पनि विवाद समाधानका लागि पहल गरेको हुनुपर्ने बुझिएको छ ।
भारत-चीन सीमामा पछिल्लो समयदेखिएको घटनाक्रमका कारण दुवैदेश बिच विवाद बढेपछि शनिबार लेहस्थित कोर कमाण्डर र चीनका कमाण्डरका बीच हिजो शनिबार भएको बैठकमा दुवै देश विभिन्न द्विपक्षीय समझौता अनुरूप सीमा क्षेत्रसम्बन्धित मुद्दाहरुलाई शान्तिपूर्ण समाधानका लागि सहमत भएको भारतको विदेश मन्त्रालयले जनाएको छ । बैठकमा भारत र चीन गतिरोधलाई समाधान गर्न र सीमा क्षेत्रमा शान्ति सुनिश्चित गर्नका लागि सैन्य र कुटनीतिक संवाद जारी राख्न पनि सहमति भएको छ ।
यसअघि भारतका विदेश मन्त्रालयका पूर्वी एशियाका संयुक्त सचिव नवीन श्रीवास्तवले पनि भिडियो कन्फ्रेन्सिङका माध्यमले चीनका विदेश मन्त्रालयका महानिर्देशक वू जियाङगहोसँग संवाद गरि शान्तिपूर्ण रुपमा विवाद समाधान गर्ने सहमति भएको थियो ।
