काठमाडौँ, २२ फरवरी, २०२०
मूल्य आकाशिएपछि नेपाली बजारमा सुनको बिक्री ह्वात्तै घटेको छ । नेपाल सुनचाँदि व्यवसायीहरुका अनुसार फागुन सुन बिक्रीको सिजन भए पनि कारोबारमा ७० प्रतिशतसम्मले गिरावट आएको हो ।
‘अरु बेला फागुन महिनामा दैनिक ५० किलोसम्म सुन बिक्री हुन्थ्यो‚’ सुनचाँदी व्यवसायी महासंघले जनाएको छ । ‘अहिले मुस्किलले १० देखि १५ किलोसम्म मात्रै बिक्री भइरहेको छ ।’ सुनको भाउ यो साता मात्रै तोलामा १६ सय रुपैयाँले बढेर अहिलेसम्मकै उच्च ७८ हजार १०० रुपैयाँ पुगेको छ ।
अन्तराष्ट्रिय बजार हेर्दा मूल्य अझै बढ्ने देखिएको छ । अन्तराष्ट्रिय बजारमा प्रतिऔंश एक डलर मूल्य बढ्दा नेपालमा सुन तोलाको ४० रुपैयाँ महँगो हुन्छ । शुक्रबार बेलुकीसम्मको अन्तराष्ट्रिय बजार हेर्दा प्रतिऔंश १५ डलरसम्म भाउ बढेकाले आइतबार बजार खुल्दा सुनको भाउ तोलाको ७९ हजार रुपैयाँको हाराहारी पुग्ने अनुमान गरिएको हो  ।
विश्वमै आर्थिक गतिविधि सुस्त भएका कारण सुनको भाउ बढेको हो । अन्य क्षेत्रको कारोबार सुस्ताएका कारण मानिसहरुले सुनमा लगानी बढाउँदा माग बढेर भाउ पनि बढेको  छ । यही गतिमा भाउ बढ्ने हो भने सुनको भाउ प्रतितोला ८० हजार नाघ्ने व्यवसायीको अनुमान छ ।