काठमाडौं, 26 मई 2022
नेकपा एमालेका अध्यक्ष केपी शर्मा ओलीले स्थानीय तहको चुनाव शान्तिपूर्ण र निष्पक्ष ढंगले हुन नसकेको आरोप लगाउनुभएको छ । बिहीबार प्रतिनिधिसभामा सरकारको नीति तथा कार्यक्रममाथिको छलफलमा भाग लिदै ओलीले चुनावमा सत्ता पक्षले धाँधली गरेको आरोप समेत लगाउनुभयो । उहाले एमालेलाई पत्तासाफ गरिदिने सत्ता गठबन्धनको घोषित नीति नै भएको भन्दै बुथ नै कब्जा गरेर सत्तापक्षले चुनाव जितेको उल्लेख गर्नुभयो । उम्मेदवारलाई थुनेर, बुथ कब्जा गरेर, सत्तापक्षले बुथ कब्जा गर्दा प्रहरी निरीह भएर हेरेर बसेको उहाको भनाई छ । ओलीले गठबन्धनले निर्वाचन गर्न नचाहिरहेको अवस्थामा एमालेको दवावका कारण निर्वाचन सम्भव भएको तर्क गर्नुभयो । ओलीले अहिले निर्वाचनमा धाँधली गर्ने कुरामा नयाँ कीर्तिमान नै कायम भएको धारणा राख्नुभयो । उहाले एमाले शसक्त पार्टी भएकाले आम निर्वाचनपछि सरकारमा आउने दावी गर्नुभयो ।नीति तथा कार्यक्रममा सबै नेपाली बिच सद्भाव र सहमति हुने उल्लेख गरिएको तर प्रतिपक्षीलाई सिद्धाउने गठबन्धनको नीति मेल नखाएको उहाले बताउनुभयो । ओलीले सरकारको नीति तथा कार्यक्रम गन्तव्यबिहिन भएको र जनता अल्मल्याउने कुरा मात्र राखिएको बताउनुभयो । सरकारको नीति तथा कार्यक्रम अनुसार नै आगामी आर्थिक बर्षको बजेट आए मुलुकको आर्थिक क्षेत्र थप संकटमा पुग्ने उहाले बताउनुभयो । ओलीले सरकारको कार्यक्रममा पपुलिस्ट, गैरजिम्मेवार, अनुत्तरदायी प्रवृत्ति र अर्थतन्त्रमाथी खेलबाड गर्ने प्रवृति बजेटले पुष्टि गर्ने देखिएको तर्क गर्नुभयो । त्यस्तै उहाले अमेरिकी उपविदेशमन्त्री उज्रा जियाको भ्रमणका क्रममा सरकारले असंलग्न परराष्ट्र नीति उल्लंघन गरेको आरोप लगाउनुभयो । नेपाल एक चीन नीतिमा छ कि छैन भन्ने बिषयमा प्रधानमन्त्रीले स्पष्ट जवाफ दिनुपर्ने उहाले बताउनुभयो । ओलीले निर्वाचन सम्पन्न हुनेबितिकै मूल्यवृद्धि गरेर सरकारले जनतालाई धोका दिएको आरोप लगाउनुभयो । उहाले वर्तमान सरकार बनेपछि मुल्यबृद्धिले नकारात्मक कीर्तिमान कायम गरेको धारणा राख्नुभयो ।
