काठमाडौं, 21 मार्च 2022
प्रमुख प्रतिपक्षी नेकपा एमालेले स्थानीय तह निर्वाचनका उम्मेदवार छनौटसम्बन्धी मापदण्डमा सामान्य हेरफेर गर्ने निर्णय गरेको छ । सोमबार काठमाडौंमा बसेको एमाले पोलिट्व्युरो बैठकले आएका सुझावका आधारमा उम्मेदवार सिफारिस र निर्णयसम्बन्धी विधि र मापदण्डमा सामान्य हेरफेर गर्ने निर्णय गरेको हो । बैठकले उम्मेदवार छनौटका लागि ६ बुँदे मापदण्ड तयार गरेको एमाले प्रचार विभाग प्रमुख पृथ्वी सुब्बा गुरुङले जानकारी दिनुभयो । त्यस्तै बैठकले वैशाख ९ गते स्थानीय तह निर्वाचनको घोषणा पत्र सार्वजनिक गर्ने निर्णय गरेको छ । सोहि दिन केन्द्रको तर्फबाट चुनावी घोषणा पत्र र सबै स्थानीय तहहरुले आ–आफ्नो प्रतिवद्धता पत्र सार्वजनिक गर्ने निर्णय गरिएको गुरुङले बताउनुभयो । त्यस्तै पार्टीका सबै केन्द्रीय सदस्य आ–आफू मतदाता रहेको भूगोलमा केन्द्रित हुने निर्णय गर्दै बैठकले आगामी केन्द्रीय कमिटी बैठकका लागि ११ वटा एजेन्डा तय गरेको पनि गुरुङले जानकारी दिनुभयो । एमालेको केन्द्रीय कमिटी बैठक चैत ९ र १० गते बस्ने तय भएको छ ।
