काठमाडौं, 10 फरवरी 2023
नेकपा (एमाले) का अध्यक्ष तथा पूर्व प्रधानमन्त्री केपी शर्मा ओलीले आफूहरुले भनेकै व्यक्ति अबको राष्ट्रपति हुने दाबी गरेका छन् । आजको संसद् बैठकबाट बाहिरिने क्रममा उनले यस्तो दाबी गरेका हुन् । सञ्चारकर्मीले अबको राष्ट्रपति को हुन्छ भन्ने प्रश्नमा उनले यस्तो जवाफ फर्काएका हुन् । उनले भने,‘हामीले जो भन्छौं उही हुन्छ ।’
पुष १० गते माओवादी केन्द्रका अध्यक्ष पुष्पकमल दाहालले प्रधानमन्त्रीमा दाबी गर्न शितलनिवास जानुअघि एमाले अध्यक्ष ओलीकै निवासमा प्रधानमन्त्री, सभामुख, राष्ट्रपति, उपराष्ट्रपतिलगायतका महत्वपूर्ण पदबारे सहमति भएको जनाईएको छ ।सो सहमतिअनुसार राष्ट्रपति एमालेले पाउने बताईएको छ । त्यस्तै ओलीले सुदूरपश्चिमको सरकार ढलेपछि केन्द्रमा के हुन्छ भन्ने प्रश्नमा हेर्दै जाउँ के हुन्छ भनेका थिए । ओलीले राष्ट्रपतिको सम्बोधन सन्तुलित र मुलुकप्रतिको जिम्मेवारीबोधका साथ आएको टिप्पणी समेत गरे । राष्ट्रपति विद्यादेवी भण्डारीले आज संघीय संसदको संयुक्त बैठकलाई सम्बोधन गरेकी छन् । ७ बर्षदेखि राष्ट्रपति रहेकी भण्डारीको यो आफ्नो कार्यकालको संसदमा अन्तिम सम्बोधन हो ।
