६ दिनपछि हट्यो राष्ट्रिय सभामा एमालेको अवरोध
काठमाडौं, 11 जुलाई 2023
राष्ट्रिय सभामा विगत ६ दिनदेखिको जारी अवरोध खुलेको छ । नेकपा एमालेले २० असारदेखि राष्ट्रिय सभाको बैठक चल्न दिएको थिएन । प्रधानमन्त्री पुष्पकमल दाहाल प्रचण्डको एउटा अभिव्यक्तिलाई लिएर एमालेले बैठक चल्न दिएको थिएन ।
यसबीचमा बसेका राष्ट्रिय सभाको प्रत्येक बैठकमा प्रधानमन्त्रीको राजीनामा माग्दै एमालेका सांसदहरुले अवरोध गरेका थिए।
राष्ट्रिय सभाका अध्यक्ष गणेशप्रसाद तिमिल्सिनाले प्रधानमन्त्रीका लागि स्पष्टीकरण दिने वातावरणका लागि आग्रह गर्दा समेत एमाले सांसदहरुले अवरोध गर्दै आएका थिए ।
तर, एमाले सांसदहरुले मंगलबारको राष्ट्रिय सभाको बैठकमा भने कुनै अवरोध गरेन ।
‘प्रतिनिधि सभामा प्रधानमन्त्रीले स्पष्टीकरण दिएपछि राष्ट्रिय सभाको बैठक स्वतः खुल्यो’ राष्ट्रिय सभा सचिवालयका एक अधिकारी बताउँछन् ।
राष्ट्रिय सभामा विगत ६ दिनसम्म एमालेले गरेको अवरोधका कारण बजेटमाथिको छलफल प्रभावित भएको छ ।