कैलाली, 9 फरवरी 2020/ हिम शाह
धनगढी उप–महानगरपालिका क्षेत्रका जेष्ठ नागरिकहरुलाई घरमै पुगेर स्वास्थ्य सेवा दिन थालिएको छ। चालु आर्थिक वर्ष 2076/77 को सुरुदेखि नै धनगढी उप–महानगरपालिकाले नगर क्षेत्रका जेष्ठ नागरिकहरुलाई स्वास्थ्य सेवा दिन थालेको हो। नगरप्रमुख नृपबहादुर वडले स्वास्थ्य सेवा दिनका लागि उप–महानगरपालिकाका स्वास्थ्यकर्मीहरुलाई घरदैलोमै पुग्ने व्यवस्था गरिएको बताउनुभयो। आवश्यकता अनुसार जेष्ठ नागरिकहरुको घरमै पुगेर सेवा दिनुपर्ने पनि व्यवस्था गरिएको जानकारी दिदै नगरप्रमुख वडले एक महिनामा एक पटक अनिवार्य रूपमा जेष्ठ नागरिकसँग स्वास्थ्यकर्मीले भेटेर सेवा दिएको हुनुपर्ने बताउनुभयो।
धनगढी उप–महानगरपालिका स्वास्थ्य महाशाखा प्रमुख कुम्भराज शर्माले स्वास्थ्यकर्मीहरुले जेष्ठ नागरिकहरुको घरमै पुगेर प्रेसर जाँच गर्ने, सुगर जाँच तथा रगतको नमुना संकलन, परामर्श दिने र औषधी दिने काम गर्ने बताउनुभयो। उहाँले बजार क्षेत्रमाभन्दा गाउँतिरका वडाहरुका यो अभियान प्रभावकारी भएको बताउनुभयो। सबै नगर स्वास्थ्य केन्द्रलाई अनिवार्य रुपमा महिनामा एक पटक घरमै पुगेर जेष्ठ नागरिकलाई स्वास्थ्य सेवा दिन निर्देशन दिइएको छ।
धनगढी उप–महानगरपालिका वडा नं 12 का अध्यक्ष गणेश प्रशाद जोशीले आफ्नो वडामा जेष्ठ नागरिकहरुलाई घरमै सेवा दिने काम भैरहेको बताउनुभयो। उहाँले यसबाट जेष्ठ नागरिकहरुलाई ठूलो राहत पुग्नेसमेत बताउनुभयो।
घरदैलो अभियान नपुगेका ठाउँमा शिविरहरु संचालन गरेर बिरामीको चेकजाँच गराउने काम भैरहेको पनि प्रमुख प्रशासकिय अधिकृत सापकोटाले बताउनुभयो। सुरुमा नगर स्वास्थ्य केन्द्र भएका वडाहरुमा जेष्ठ नागरिकलाई घरमै पुगेर सेवा दिईएको भएपनि अव 19 वटै वडाका सेवा पुर्याउने उप–महानगरपालिकाको योजना रहेको प्रमुख प्रशासकिय नारायण प्रशाद सापकोटाले बताउनुभयो।
त्यस्तै धनगढी उप–महानगरपालिका 17 का जेष्ठ नागरिक कलेसु रानाले घरमै स्वास्थ्यकर्मी आएर चेकजाँच गर्ने गरेको बताउनुअभयो। उहाँले यसबाट हिडेर स्वास्थ्य संस्थामा पुगेर चेकजाँच गराउने झंझटबाट मुक्ति मिलेको बताउनुभयो।
