नयाँ दिल्ली, 29 अप्रेल
भारतमा कोरोना भाइरस कोभिड-19 बाट मृत्यु हुनेको संख्या 1 हजार नाघेको छ। भारतको स्वास्थ्य मन्त्रालयले दिएको जानकारी अनुसार अहिलेसम्म भारतमा कोरोना भाइरसको कारण मृत्यु हुनेको संख्या 1 हजार 8 पुगेको हो। पछिल्लो 24 घण्टामा भारतमा 70 भन्दा धेरै मानिसको मृत्यु भएको छ। भारतमा एकै दिन मृत्यु हुनेको यो संख्या अहिलेसम्मकै बढी हो। पछिल्लो 24 घण्टामा भारतमा 1 हजार 897 नयाँ संक्रमित थपिएका छन्। यससँगै भारतमा कुल संक्रमितको संख्या पनि 31 हजार 332 पुगेको छ।
भारतको सबैभन्दा प्रभावित राज्य महाराष्ट्रमा अहिलेसम्म 9 हजार 318 जना मानिसमा कोरोना भाइरसको संक्रमण पाइएको छ, भने त्यहाँ 400 जनाको मृत्यु भइसकेको छ। त्यस्तै गुजरातमा पनि 181 जना मानिसको मृत्यु भइसकेको छ। त्यसैगरी राजधानी दिल्लीमा संक्रमितको संख्या 3 हजार 314 पुगेको छ। त्यहाँ 54 जनाको मृत्यु भइसकेको छ, भने 1 हजार 78 जना निको भएका छन्।
मध्य प्रदेशमा मृत्यु हुनेको संख्या 129 पुगेको छ। भारतको उत्तर प्रदेशमा अहिलेसम्म 2 हजार 53 जना मानिसमा यो भाइरसको संक्रमण देखिएको छ, भने 34 जनाको मृत्यु भइसको। पश्चिम बंगालमा 725 जनामा कोरोना भाइरसको संक्रमण देखिँदा 22 जनाको मृत्यु भएको छ। बिहारमा पनि 366 जना मानिसमा भाइरसको संक्रमण देखिँदा 2 जनाको मृत्यु भएको छ।
अहिलेसम्म भारतमा 7 हजार 747 जना संक्रमित निको भएर घर फर्किसकेका छन्।
