दार्जीलिङ, 1 जनवरी 2020 / कयेश अंसारी
नयाँ वर्षको पहिलो दिन आज लोकप्रिय पर्यटकीयस्थल दार्जीलिङ पहाडमा उमंग र उत्साह छाएको छ । पहाडका मानिसहरुले वर्षको पहिलो दिनलाई पर्वको रुपमा मनाउँदै आन्नद लिएका छन । पर्यटकहरु नयाँ वर्ष मनाउन दार्जीलिङ पहाडमा आएका बेला दार्जीलिङका स्थानियहरु भने नयाँ वर्ष मनाउन पिकनिक गर्न गएका छन । अधिकांश मानिसहरु पिकनिक गर्न रिभर साईडमा गएका छन । केही मानिसहरु छिमेकीका साथमा पिकनिक गर्न गएका छन भने केही मानिसहरु आ-आफ्ना साथिभाईहरुसँग पिकनिक गर्न गएका छन । टाउनमा न्यून संख्यामा मानिसहरुको चहल-पहल देखिएको थियो भने सवारी साधनहरु पनि कमै संख्यामा सडकमा गुडेका थिए । अधिकांश सवारी साधनहरु पिकनिक खेल्न गएका मानिसहरुले बुकिङमा लगेकाले पनि सवारी साधनहरुको संख्यामा कमी देखिएको हो ।
यसअघि नयाँवर्षको पूर्वसंध्यामा दार्जीलिङको मलमा पर्यटकहरुको संख्या निकै बढेको थियो । एनआरसी र नागरिकता संशोधन कानूनको विरोधमा देशव्यापी भएको विरोध प्रदर्शनका कारण दार्जीलिङमा क्रिशमसमा पर्यटनहरुको संख्या निकै कम रहेपनि नयाँ वर्षको पूर्वसंध्यामा भने पर्यटकहरुको संख्यामा वृद्धि भएको थियो । दार्जीलिङको मुटु मानिने यहाँको मलमा पर्यटकहरुले घोडचढी र पहाडको मौसमको आनन्द लिएका छन । भारतमा शीतलहर जारी रहँदा पहाडमा पनि जाडो छ तर पछिल्लो 3 दिनदेखि दार्जीलिङमा दिनभरी घाम लाग्ने गरेकाले वरपरका क्षेत्रहरू जस्तै सिलगढी र जलपाईगढीसहित उत्तरप्रदेशका पर्यटकहरूको उपस्थित बाक्लिएको हो ।
