नयाँ दिल्ली १०, जनवरी २०२०
प्रत्येक 10 वर्षमा हुने जनगणना भारतमा आगामी अप्रील महिनाबाट शुरु हुँदैछ । यसपाला जनगणनाका लागि घर-घर पुग्ने व्यक्तिहरुले घरमूलीको मोबाइल नम्बर, घरमा भएका शौचालय, टेलिभिजन, इन्टरनेट, सवारी साधन र पिउने पानीको स्रोत लगायतका बारेमा पनि जानकारी माग्ने छन । यस वर्ष जनगणना १ अप्रिलमा शुरु भएर ३० सेप्टेम्बरसम्म चल्नेछ ।
रजिष्ट्रार जनरल र जनगणना आयुक्तले अधिसुचनामा जनगणनाको क्रममा प्रत्येक परिवारबाट सुचना संकलन गर्न जनगणना अधिकारीहरुलाई ३१ वटा प्रश्न सोध्न निर्देशन दिनु भएको छ । यद्यपि अधिसुचनामा मोबाइल नम्बर जनगणनासम्बन्धी कामका लागि मात्रै प्रयोग गरिने भनिएकोछ । यस बाहेक त्यहाँ अन्य कुनै उद्देश्य नभएको जनाइएको छ । प्रत्येक परिवारसँग टेलिफोन, मोबाइल फोन,स्मार्ट फोन, स्कुटर, साइकल, मोटरसाइकल, मोपेड, कार, जीप वा अन्य कुनै गाडी, रेडियो वा ट्रान्जिस्टर, ल्यापटप वा कम्प्युटर छ कि छैन भन्ने कुराहरुबारे जानकारी लिइनेछ ।
जनगणनाका कामदारहरुले बिजुलीका मुख्य स्रोतहरु,परिवारसँग शौचालयको सुविधा, प्रयोग गरिएको पानी निकासी, भान्छाको उपलब्धता, एलपिजी वा पीएनजी जडान र खाना पकाउन प्रयोग हुने मुख्य इन्धनहरु प्रयोग हुन्छ या हुदैन भन्ने विषयहरु सम्बन्धी सोधपुछ गर्नेछन् ।
२०२१ को जनगणना, पारम्परिकमा कागज र कलमको सट्टा मोबाइल फोन मार्फत गरिनेछ ।
