काठमाण्डौ, 13 जनवरी 2020
नेपाल कम्युनिष्ट पार्टी नेकपाको भातृ संस्था अनेरास्ववियुको केन्द्रीय कमिटीका सदस्यहरुले सपथ ग्रहण गरेका छन् । आइतबार काठमाडौंमा आयोजित एक कार्यक्रममा 3 सय 35 जना केन्द्रीय कमिटीका सदस्यहरुलाई पार्टी महासचिव विष्णु पौडेलले सपथ खुवाउनुभएको हो । सपथ ग्रहण कार्यक्रमलाई सम्बोधन गर्दै महासचिव पौडेलले दुई पार्टीबीचको एकता र पछिल्लो समय प्राप्त उपलब्धीहरुमा विद्यार्थी नेताहरुको सबैभन्दा बढि भूमिका रहेको बताउनुभयो ।
उहाँले भन्नुभयो ‘हामीले जुन उपलब्धी प्राप्त गरेका छौं नेपालको कमुनिष्ट आन्दोलनले जुन उपलब्धी प्राप्त गरेको छ यो कुनै इश्वरको वरदान होइन्, हाम्रा सही नीतिहरुको प्रतिफल हो, सक्षम नेतृत्वको प्रतिफल हो नीति र नेतृत्वलाई अनुसरण गर्दै अगाडी बढ्ने योद्धाहरुको प्रतिफल हो ।’ त्यस्तै उहाँले पछिल्लो समय पार्टी भित्र विद्रोह र नेताहरुबीच अन्तरविरोध सिर्जना गरेर नेपाल कम्युनिष्ट पार्टी (नेकपा)लाई कमजोर पार्ने शक्तिहरु लागिरहेको बताउनुभयो । उहाँले पार्टी एकतालाई जोगाएर जान सबै एक हुनुको विकल्प नभएको समेत बताउनुभयो।
महासचिव पौडेलले विद्यार्थी नेताहरुको सकृयतामा ठुलाठुला सफलताहरु प्राप्त भएको इतिहास रहेकाले पार्टी एकतालाई अझ बलियो बनाउन भूमिका निर्वाह गर्न अग्रह गर्नुभयो । त्यस्तै अनेरास्ववियुले 45 सदस्यीय स्थायी कमिटी पनि बनाएको छ । जसमा पूर्व एमाले निकट अनेरास्ववियुबाट 24 र पूर्व माओवादी निकट अनेरास्ववियु क्रान्तिकारीबाट 21 जना रहेका छन् ।
