काठमाडौँ, २४ जनवरी
निर्वाचन आयोगले बिहीबार भएको राष्ट्रिय सभा सदस्यको निर्वाचनको परिणाम सार्वजनिक गरेको छ ।
आयोगका प्रवक्ता राजकुमार श्रेष्ठले सात वटै प्रदेशको सम्पूर्ण परिणाम आइसकेको बताउनुभयो । उहाँले निर्वाचनमा नेपाल कम्युनिष्ट पार्टी (नेकपा)ले १६ सिट र प्रदेश नम्बर २ मा २ वटा सिटमा राष्ट्रिय जनता पार्टीका उम्मेदवारहरु निर्वाचित भएको जानकारी दिनुभयो । प्रवक्ता श्रेष्ठले निर्वाचन शान्तिपूर्ण रुपमा सम्पन्न भएको समेत बताउनुभयो । उहाँले प्रदेश नम्बर १ मा नेपाल कम्युनिष्ट पार्टी (नेकपा)का इन्दिरा देवी गौतम, गोपीबहादुर सार्की आछामी, र देवेन्द्र दाहाल, प्रदेश नम्बर २ मा नेपाल कम्युनिष्ट पार्टी (नेकपा)का तुलसा कुमार दाहाल र राधेश्याम पासवान र राष्ट्रिय जनता पार्टी नेपालका शेखर कुमार सिंह र मृगेन्द्र कुमार सिंह यादव, बागमती प्रदेशबाट नेपाल कम्युनिष्ट पार्टी (नेकपा)का गंगा कुमारी वेलवासे र बेदुराम भुसाल, गण्डकी प्रदेशबाट नेपाल कम्युनिष्ट पार्टी (नेकपा)का भगवती न्यौपाने र नारायणकाजी श्रेष्ठ, प्रदेश नम्बर ५ बाट नेपाल कम्युनिष्ट पार्टी (नेकपा)का बिमला घिमिरे, जगप्रसाद शर्मा, गोपाल भट्टराई, कर्णाली प्रदेशबाट नेपाल कम्युनिष्ट पार्टी (नेकपा)का सुमित्रा वि.सी. र मायाप्रसाद शर्मा र सुदूरपश्चिम प्रदेशबाट नेपाल कम्युनिष्ट पार्टी (नेकपा)का शारदा देवी भट्ट र तारामान स्वांर निर्वाचित भएको बताउनुभयो ।
निर्वाचनमा ५ सय ५० प्रदेश सभा सदस्य र स्थानीय तहका प्रमुख उपप्रमुख र अध्यक्ष उपाध्यक्ष १ हजार ५ सय ६ जना सहित कुल २ हजार ५६ जना मतदाता रहेकोमा २ हजार ४० जनाले मतदान गरेको उहाँले जानकारी दिनुभयो । सातै प्रदेशको उच्च अदालत रहेका जिल्ला सदरमुकाम प्रदेश १ को मोरङ, प्रदेश २ को धनुषा, बागमती प्रदेशको ललितपुर, गण्डकी प्रदेशको कास्की, प्रदेश ५ को दाङ, कर्णाली प्रदेशको सुर्खेत र सुदुरपश्चिमको डोटीमा निर्वाचन भएको थियो । १८ जना राष्ट्रिय सभा सदस्यका लागि भएको निर्वाचनको मतपरिणाम संवैधानिक व्यवस्था अनुसार ७ दिन भित्र राष्ट्रपति समक्ष पेश गर्नुपर्ने व्यवस्था रहेको छ ।
