कैलाली, 5 फरवरी 2020/ हिम शाह
नेपाली काँग्रेसले भारतले मिचेको नेपाली भूमि फिर्ता गराउन माग गर्दै सुदूरपश्चिम प्रदेशसभामा संकल्प प्रस्ताव दर्ता गरेको छ। काँग्रेसका प्रदेशसभा सदस्य भरतबहादुर खड्का र टेकबहादुर रैकाले समर्थन गरेको संकल्प प्रस्ताव काँग्रेसका तर्फबाट प्रदेशसभा सदस्य कर्णबहादुर मल्लले मङ्गलबार प्रदेशसभामा दर्ता गराउनुभएको हो। संकल्प प्रस्तावमा नेपालको सार्वभौमिक सीमामाथी एकतर्फी रूपमा अतिक्रमण गरेको भारत सरकारको कदम दुखःद एवम् आपत्तीजनक छ, भनिएको छ।
“भारत सरकारले केही महिना अघि नेपालको सुदूरपश्चिममा पर्ने कालापानी क्षेत्रलाई भारतीय नक्समा समावेश गरेको तथ्यप्रती हामी सबै जनप्रतिनिधिहरुको गम्भीर ध्यानाकर्षण भएको छ। भारतीय सरकारले हाम्रो भूमि अतिक्रमण गरिरहँदा नेपाल सरकार र प्रदेश सरकार मौन देखिनु दुखःद विषय हो, तसर्थ प्रदेश सभा उक्त मिचिएको भूमि अविलम्ब फिर्ता गराउन र राष्ट्रिय अखण्डतालाई जोगाउन दृढताका साथ यो संकल्प प्रस्तावलाई पारित गरि केन्द्र सरकार र प्रदेश सरकारले अविलम्ब उक्त मिचिएको भूमि भारत सरकारको नक्साबाट हटाउन पहल गरोस् भन्न जोडदार माग गर्दछौ।” संकल्प प्रस्तावमा भनिएको छ।
