नयाँ दिल्ली, 9 फरवरी 2020
दिल्लीमा फेरि एक पटक आम आदमी पार्टीको पूर्ण बहुमतको सरकार बन्ने देखिएको छ । यद्धपी शनिबार भएको दिल्ली विधानसभाको मतगणना मंगलबार हुनेछ । तर विभिन्न फरक-फरक एक्जिट पोलहरुले आम आदमी पार्टी फेरि सत्तामा पुग्ने देखाईरहेका छन । दिल्लीमा मुख्यगरि त्रिकोणीय मुकाबिला रहेको थियो । आम आदमी पार्टी, भारतीय जनता पार्टी र काँग्रेसले आ-आफ्ना एजेण्डामा चुनाव लडेपनि दिल्लीका मतदाताहरुलाई निशुल्क पानी, 2 सय युनिटसम्म निशुल्क बिजुली र दिल्लीको विकासको एजेण्डाले छोएको संकेत देखिएको छ । दिल्ली विधानसभाका लागि शनिवार भएको चुनावमा 61 प्रतिशतभन्दा धेरै मतदान भएको छ। गत विधानसभा चुनावमा 67 प्रतिशत मतदान भएको थियो । चुनाव शान्तिपूर्ण रुपमा सम्पन्न भएको दिल्लीका मुख्य चुनाव अधिकारी डाक्टर रणवीर सिंहले बताउनु भएको छ । मतदान समाप्त भइसकेपछि अब सबैको ध्यान मंगलवार हुने मतगणनामा रहेको छ ।
