नयाँदिल्ली,११ फरवरी, २०२०
दिल्ली विधानसभा चुनावको मतगणना सुरु भएको छ । सुरुवाती परिणाममा आम आदमी पार्टी (आप) स्पष्ट बहुमततर्फ अग्रसर बनेको देखिएको छ । यद्यपि, उसलाई १० भन्दा बढी सिटमा घाटा भएको देखिएको छ । पछिल्लो विधानसभा चुनावमा उसले ६७ सिटमा जित हासिल गरेको थियो ।
आपले गुमाएको सिट भारतीय जनता पार्टी (भाजपा) ले जित्ने सङ्केत देखिएको छ । बिहान साढे ९ बजेसम्मको मतपरिणाम अनुसार आप ५३, भाजपा, १६ र कँग्रेसले १ सिटमा अग्रता बनाएको छ ।
दिल्लीमा अहिले पनि आप कै सरकार छ । भाजपाले दिल्लीमा पछिल्लो २२ वर्षदेखि सरकार बनाउन सकेको छैन भने कँग्रेस पनि ७ वर्षदेखि सत्ता बाहिर छ ।
मतगणना अघि उपमुख्यमन्त्री मनिष सिसोडियाले भनेका थिए, ‘हामी यो चुनाव जित्नेमा ढुक्क छौँ किनभने पछिल्लो ५ वर्ष हामीले जनताको लागि काम गरेका छौँ ।’
यसअघि, सबै एक्जिट पोलमा आपले नै सजिलै बहुमत हासिल गर्ने देखिएको थियो । तर, भाजपाले भने त्यसलाई खारेज गर्दै आइरहेको थियो । उसले यो चुनावमा ४८ सिट जित्ने दाबी गरिरहेको थियो ।
