काठमाडौं,११ फरवरी, २०२०
नेपाल कम्युनिस्ट पार्टी (नेकपा) सांसद योशोदा गुरुङ (सुवेदी) ले स्वस्थानी व्रतकथा र ऋषिपञ्चमी व्रतकथाका पाना च्यात्न माग गरेकी छन् ।
प्रतिनिधिसभाको बैठकलाई सम्बोधन गर्दै सांसद सुवेदीले यस्तो माग गरेकी हुन् । संसदको शून्य समयमा बोल्दै उनले छाउपडी जस्तो संस्कारलाई मजबुद पार्ने स्वस्थानी व्रतकथा र ऋषिपञ्चमी व्रतकथाका पाना च्यात्न माग गरेकी हुन् ।
उनले छाउगोठ भत्काउने सरकारले अभियानको प्रशंसा गर्दै उनले यस्तो बताएकी हुन् ।
उनले सरकारले चलाएको छाउगोठ भत्काउने अभियान स्वागतयोग्य रहेको बताइन् । ‘सदियौंदेखि महिलालाई जगडेर राखेको यो कुरीतिलाई हटाउन केबल बारीमा भएको छाउगोठ मात्र भत्काएर हुँदैन। मान्छेको मन मस्तिकबाट छाउगोठ भत्काउनुपर्छ,’ उनले भनिन् ।
उनले यस्ता कुरीति हटाउन देशको हरेक क्षेत्रबाट सबैको उतिकै खाँचो रहेको बताइन् । के गाउँ, के सहर, के पश्चिम, के पूर्व कुनै न कुनै रुपमा छाउ भत्काउन सरकार लगायत सबै नागरिकको खाँचो रहेको भन्दै सरकारको ध्यानाकर्षण गरिन् ।
