नयाँदिल्ली, २६ फरवरी, २०२०
भारत दिल्लीमा भईरहेको हिंसाको मुख्य जिम्मेवारी गृहमन्त्री अमित शाहको भएको भारतीय राष्ट्रिय कांग्रेसकी अन्तरिम अध्यक्ष सोनिया गान्धीले आरोप लगाएकी छन् ।
भाजपा नेताले दिएको विवादित अभिव्यक्तिका कारण दिल्लीमा हिंसा भड्कीएको उनको आरोप छ ।
पत्रकार सम्मेलनमार्फत पछिल्ला केही दिनमा भइरहेको हिंसा नियोजित भएको भन्दै गृहमन्त्री अमित शाहले तत्काल पदबाट राजीनामा दिनुपर्ने बताएकी हुन् ।
केही दिनअघि भारतीय जनता पार्टी (भाजपा) का नेता कपिल मिश्राले नागरिकता संशोधन कानुन (सीएए) विरोधी प्रदर्शनकारीलाई तीन दिन भित्र सडकबाट हटाउन प्रहरीलाई चेतावनी दिएका थिए । मिश्राको उक्त अभिव्यक्तिपछि मोदी नेतृत्वको भाजपा सरकारविरुद्ध आन्दोलन चर्किएको थियो।
उनले भनिन्, ‘केन्द्र सरकार र दिल्ली पुलिसलाई समयमै कारबाही नगर्दा २० जनाको ज्यान गइसकेको छ । जसमा एक जना प्रहरीको समेत मृत्यु भएको छ । पीडितका परिवारप्रति कांग्रेसको गहिरो समवेदना छ ।’
‘यो पुरै घटनालाई हेर्दा यसको मुख्य जिम्मेवार केन्द्र सरकार र गृहमन्त्री छन् । उनले जिम्मेवारी लिएर राजीनामा दिनुपर्छ’, सोनियाले अगाडि थपिन्, ‘दिल्ली सरकार पनि शान्ति कायम गर्न असफल भएको छ । दुबै सरकारको असफलताका कारण दिल्ली यस त्रासदीको शिकार भएको छ ।’
