काठमाडौँ, २७ फरवरी,२०२०
काठमाडौँको बानेश्वरस्थित एक पार्टी प्यालेसमा विवाहको लागी भोज थियो । छोरीको बिहे भब्य बनाउन परिवारले कुनै कुराको कमी राखेको थिएन ।
१५ दिनअघि काठमाडौँकै एक भब्य होटलमा भएको टीकाटालोपछि बिहेको मिति टुंगो गरिएको थियो ।
केटीको परिवारले जन्तीलाई खुवाउन भनेर चारवटा खसी नै काठमाडौँ मूलथलो पूर्वी पहाडी जिल्लाबाट ल्याएको थियो । बिहान १० बजेदेखि आउनेजाने निम्तालुको लर्काे चलिरहँदा १२ बजे आउने भनेका जन्ती आइनपुग्दाखेरी केटी पक्षले फोन डायल गर्न थाले । आफूलाई इन्जिनियर बताउने वर आश्रेय बस्नेतले फोनमा आत्तिएको स्वर पारेर आफ्ना माइलो बुवा अचानक बितेकाले आउन ढिला भएको बताउँदै भने, ‘यताको तारतम्य मिलाएर जन्ती हिँड्छ । ’ सिनामंगल घर भई आफूलाई डाक्टरको छोरा बताउने उनी दिन ढल्किँदा पनि जन्ती लिएर आएनन् । आफन्तले महानगरीय प्रहरीवृत्त बानेश्वरमा खबर गरे । प्रहरीलाई उजुरी गरेपछि प्रहरी वस्नेत बस्ने भनिएको घर पुग्दा उनी डेरमा बस्ने रहेछन्न्, कोठामा पनि ताला लागेको थियो ।
केटापक्षले हजुरआमा भनेर चिनाएकी मान्छे पनि फेला परिनन् । कार्डमा दिइएको केटाको बाबु–आमाको नाम पनि नक्कली रहेको खुल्यो । केटाको वास्तविक नाम पनि साहिल बस्नेत रहेछ । काठमाडौँमा नभेटिएका बस्नेत अन्ततः पोखरा विमानस्थलमा भेटिए । उनको साथबाट चार हजार अमेरिकी डलर पनि फेला परेको छ ।
विदेशी मुद्राको सोत नखुलेपछि प्रहरीले उनलाई काठमाडौँको साटो थप अनुसन्धानको लागि राजश्व अनुसन्धान विभागको बुटवल कार्यालय पठाएको छ ।
