नयाँदिल्ली, ६ मार्च, २०२०
फुटबलर रोनाल्डिन्हो पाराग्वेमा पक्राउ परेका छन् । नक्कली दस्तावेज प्रयोग गरेर दक्षिण अमेरिकी मुलुकमा प्रवेश गरेको आरोपमा उनी पक्राउ परेका हुन् ।
सन् २००२ को विश्वकप विजेता ३९ वर्षीय खेलाडीलाई रिसोर्ट याच एन्ड गल्फ क्लब पारागुयायोबाट भाइ रोबर्टोसँगै बुधबार राति पक्राउ गरिएको पाराग्वेको गृह मन्त्रालयले पुष्टि गरेको छ ।
ला नासियोनका अनुसार उनी र रोबर्टो पाराग्वेन नागरिक बनेर होटलमा बसिरहेका थिए । पाराग्वेको प्रहरीका अनुसार रोनाल्डिन्हो त्यहाँका क्यासिनो मालिक नेल्सन बेलोटीले निमन्त्रणामा पाराग्वे पुगेका थिए । उनले त्यहाँ विभिन्न कार्यक्रममा भाग लिने तालिका तय थियो ।
दक्षिण अमेरिका र युरोपमा सफल करियर बिताएका रोनाल्डिन्होले च्याम्पियन्स लिग, ला लिगा र सिरिए ए को उपाधि जितेका थिए । सन् २००५ मा उनले बालोन डि ओर जित्नुका साथै सन् २००४ र २००५ मा फिफा वर्ष खेलाडीको उपाधि पनि जित्न सफल भएका थिए। उनले सन् २००२ मा जापान र दक्षिण कोरियामा आयोजित विश्वकप जितेका थिए भने सन् १९९९ मा कोपा अमेरिकाको उपाधि पनि हात पारेका थिए।
