बैतडी, 7 मार्च 2020/ हिम शाह

लगातारको वर्षाको कारण बैतडीका उच्च लेकाली क्षेत्रमा फेरी हिमपात भएको छ। बिहीबारदेखि मौसममा आएको परिवर्तनसंगै शुक्रबार राती उच्च लेकाली क्षेत्रमा हिमपात भएको हो। खोड्पे,श्रीभावर, गर्जेलगायतका उच्च क्षेत्रमा हिमपात भएको स्थानीयहरुले बताएका छन्।
यो वर्ष लगातारको बर्षा र हिमपातले अझै पनि चिसो कम हुन नसकेको पाटन नगरपालिका ८ खोड्पेका मोहनसिंह ऐरले बताउनुभयो। लगातारको बर्षा र हिमपातले चिसो बढेको उहाँले बताउनुभयो। यो बर्ष फागुन अन्तिम साता सम्म हिमपात नरोकिएपछि उच्च लेकाली क्षेत्रमा चिसो जनजीवन कष्टकर भएको सिगास ९ चौखामकी लक्ष्मी चन्द शाहले जानकारी दिनुभयो । बर्षा र हिमपातले अत्यधिक चिसो बढ्दा बाहिर निस्कन समेत मुस्कील भएको उहाँले बताउनुभयो ।
चिसोको समयमा श्वासप्रश्वास र न्यूमोनिया जस्ता रोगहरु लाग्न सक्ने भएकाले यो बेला वृद्धवृद्धा र बालबालिकाको स्वास्थ्यमा ध्यान दिन स्वास्थ्यकर्मीहरुले बताएका छन् । यो बर्ष हिमपात र बर्षा नरोकिएपछि बेँसी क्षेत्रमा गहुँबालीमा समेत असर परेको छ । बेँसी क्षेत्रमा बर्षाका कारण गहुँबालीमा क्षति पुगेको किसानहरुले बताएका छन् । लगातारको बर्षाको कारण गहुँमा विभिन्न रोग देखा परेका कृषि प्राविधिकहरुले बताएका छन् ।