बनारस, 8 मार्च
नेपाली काँग्रेसका महामन्त्री शशाङ्क कोइरालाले नेपाल र बनारसको बहुआयामिक सम्बन्धहरुले समग्र नेपाल- भारतको सम्बन्धलाई उचाई दिने काम गरेको बताउनुभएको छ ।
नेपाल अध्ययन केन्द्र काशी हिन्दु विश्वविद्यालय र नेपाल विद्यार्थी संघ भारतले नेपालको प्रजातन्त्र स्थापनामा काशी क्षेत्रले खेलेको भुमिका’ शिर्षकमा बनारसमा आयोजनमा ‘ अन्तराष्ट्रीय गोष्ठीमा प्रमुख अतिथीको रुपमा सम्बोधन गर्दै नेपाली कोईरालाले वाराणसीमा बाल्यकालदेखि विश्वविद्यालयसम्मको जीवन बिताएकाले यहाँ गहिरो भावनात्मक सम्बन्ध रहेको बताउनु भयो ।
नेपालमा तत्कालिन जहाँनिया राणा शासनको अन्त्य र प्रजातन्त्र स्थापनार्थ संघर्षका दिनहरुमा काशी क्षेत्रले ठूलो योगदान गरेको उहाँले स्मरण गर्नुभयो ।
कार्यक्रमको अध्यक्षता गर्नु भएका भारतका प्रसिद्ध समाजवादी चिन्तक जय प्रकाश नारायण र विश्वविद्यालयका पूर्व उपकुलपती प्रोफेसर हरिकेश सिंहले बीपी कोईरालाले नेपालमा प्रजातन्त्र स्थापनाका लागी ठूलो भुमिका निर्वाह गरेको र उहाँको नाममा काशी हिन्दु विश्वविद्यालयमा अनुसन्धान केन्द्रको स्थापना गरि अनुसन्धानको कामलाई अगाडी बढाउनु पर्ने बताउनुभयो।
समारोहमा बोल्दै नेपाली काँग्रेसका केन्द्रीय सदस्य डा. मिनेन्द्र रिजालले ‘दक्षिण एसियामा प्रजातन्त्रको अवस्था र नेपालको सन्दर्भ’ भन्ने शिर्षकमा आफ्नो भनाई राख्नु भयो। त्यसैगरि केन्द्रिय सदस्य दिपक गिरीले नेपाल र बनारसका बहुआयामिक सम्बन्धहरुको बारेमा चर्चा गर्नु भयो ।
अर्का केन्द्रीय सदस्य डा. चन्द्र भण्डारीले प्रजातन्त्र स्थापनाले सामाजिक रुपान्तरणमा पुर्याएको योगदानको चर्चा गर्नुभयो। पूर्व अर्थ राज्यमन्त्री उदय समशेर राणाले नेपालको परिप्रेक्ष्यमा आर्थिक प्रजातन्त्रको अवस्थाका बारेमा आफ्ना भनाई राख्नुभयो।
नेपाली काँग्रेसका केन्द्रीय आमन्त्रित सदस्य एवम नेपाली जनसम्पर्क समिति भारतका अध्यक्ष बालकृष्ण पाण्डेले जनसम्पर्क समिती भारतले प्रजातान्त्रिक आन्दोलनमा खेलेको भुमिका र भारत नेपालको सम्बन्धका बारेमा भनाई राख्नुभयो।
कार्यक्रममा भारतको राज्य सभाका पुर्व सांसद आनन्द भाष्कर रापुलु, बनारस हिन्दु विश्वविद्यालयका कूलपती प्रो. एम के सिंह , विभिन्न विभागका संकाय प्रमुखहरु, वाराणसीका प्रतिष्ठित व्यक्तित्वहरु, विभिन्न पार्टीका नेताहरु, विभिन्न नेपाली संघ सस्थाका प्रतिनिधिहरु, विश्वविद्यालयका विद्यार्थीहरु गरि करिव ३ सय जनाको सहभागिता रहेको थियो।
उक्त कार्यक्रमको संयोजन नेपाल अध्ययन केन्द्र ,काशी हिन्दु विश्वविद्यालयका संयोजक प्रो. बि. वि. सिंह र नेपाल विद्यार्थी संघ भारतका महामन्त्री सुर्य न्यौपानेले गर्नुभएको थियो।
